வரும் 2026 தமிழக சட்டமன்றத் தேர்தலில், ஆளுங்கட்சியான திமுக தலைமையிலான கூட்டணியிலேயே தொடர காங்கிரஸ் மேலிடம் விரும்புவதாக அரசியல் வட்டாரங்களில் தகவல்கள் வெளியாகியுள்ளன. நடிகர் விஜய்யின் தமிழக வெற்றிக் கழகம் (தவெக) காங்கிரஸுடன் கூட்டணி அமைக்க ஆர்வம் காட்டி வரும் நிலையில், காங்கிரஸ் தலைமை திமுக பக்கமே சாயும் முடிவை நோக்கி நகர்வது கவனம் பெற்றுள்ளது.

தேர்தல் காலத்தில் ஒரு கட்சிக்கு மிக முக்கியமான அம்சமாக கருதப்படுவது வலுவான நிதிப் பின்னணி. காங்கிரஸ் கட்சி தற்போதைய சூழலில் பெரும் அளவிலான தேர்தல் செலவுகளைச் சமாளிப்பதில் சவால்களை எதிர்கொண்டு வருகிறது. கடந்த தேர்தல்களில் திமுகவுடன் கூட்டணியில் இருந்தபோது, காங்கிரஸ் வேட்பாளர்களுக்கான பிரச்சாரச் செலவுகள் மற்றும் களப்பணிகளுக்கு திமுக தரப்பில் இருந்து கணிசமான பொருளாதார ஆதரவு கிடைத்ததாக கூறப்படுகிறது. இந்த ‘விட்டமின் எம்’ காரணமே, காங்கிரஸ் மீண்டும் திமுக கூட்டணியையே பாதுகாப்பான தேர்வாகக் கருதுவதற்கான முக்கிய காரணமாக சொல்லப்படுகிறது.

இதற்கிடையில், தவெக உடன் கூட்டணி அமைப்பதில் சில நடைமுறை சிக்கல்கள் இருப்பதாக டெல்லி காங்கிரஸ் தலைவர்கள் மதிப்பிடுகின்றனர். தவெக ஒரு புதிய அரசியல் கட்சியாக இருப்பதால், திமுகவைப் போல வலுவான நிதி ஆதாரமும், பூத் மட்டத்திலான அமைப்பு கட்டமைப்பும் தற்போதைக்கு இல்லை. ஒருவேளை தவெக-வுடன் கூட்டணி வைத்தால், தேர்தல் செலவுகளின் பெரும்பகுதியை காங்கிரஸ் கட்சியே ஏற்க வேண்டிய சூழல் உருவாகும். இது தற்போதைய நிலையில் தமிழக காங்கிரஸுக்கு சாத்தியமற்றது என டெல்லி தலைமை கருதுகிறது.

இதனால், தவெக தரப்பிலிருந்து வரும் அழுத்தங்களையும் அழைப்புகளையும், திமுகவிடமிருந்து கூடுதல் தொகுதிகளைப் பெறுவதற்கான பேரம் பேசும் கருவியாக மட்டுமே காங்கிரஸ் பயன்படுத்துகிறது என்ற கருத்தும் நிலவுகிறது. தவெக கூட்டணிக்குச் செல்லலாம் என்ற சிக்னலை காட்டி, திமுகவிடமிருந்து 40-க்கும் மேற்பட்ட தொகுதிகளைப் பெற முடியும் என காங்கிரஸ் கணக்குப் போடுவதாக அரசியல் பார்வையாளர்கள் கூறுகின்றனர்.

இந்நிலையில், திமுக – காங்கிரஸ் கூட்டணி பேச்சுவார்த்தைகள் தற்போது இறுதிக்கட்டத்தை எட்டியுள்ளதாக திமுக வட்டாரங்கள் தெரிவிக்கின்றன. டெல்லியில் உள்ள ராகுல் காந்தியின் இல்லத்தில், திமுக எம்பி கனிமொழி நேரில் சந்தித்து பேசியதைத் தொடர்ந்து, இரு கட்சிகளுக்கும் இடையிலான கூட்டணி பெரும்பாலும் உறுதி செய்யப்பட்டுள்ளதாக கூறப்படுகிறது. சுமார் ஒரு மணி நேரம் நீடித்த இந்த உயர்மட்ட ஆலோசனையில், தமிழக அரசியல் நிலவரம் மற்றும் இரு கட்சிகளின் உறவு குறித்து விரிவாக விவாதிக்கப்பட்டதாக தகவல்கள் தெரிவிக்கின்றன.

கூட்டணி உறுதியானாலும், தொகுதிப் பங்கீடு தொடர்பான பேச்சுவார்த்தையில் இன்னும் சிக்கல்கள் நீடிக்கலாம் என கூறப்படுகிறது. தொகுதிப் பங்கீடு பேச்சுவார்த்தைகளை முன்னெடுக்க காங்கிரஸ் சார்பில் மூத்த தலைவர் முகுல் வாஸ்னிக் நியமிக்கப்பட்டுள்ளார். கடந்த 2021 தேர்தலில் 25 தொகுதிகளில் போட்டியிட்ட காங்கிரஸ், இம்முறை அந்த எண்ணிக்கையை 40 தொகுதிகளாக உயர்த்த வலியுறுத்தி வருகிறது. ஆனால் திமுக தரப்பு அதிகபட்சமாக 28 முதல் 30 தொகுதிகள் வரை மட்டுமே வழங்க தயாராக இருப்பதாக தகவல்கள் வெளியாகியுள்ளன.

இதனால், இறுதி முடிவு எடுக்கப்படும் வரை திமுக – காங்கிரஸ் இடையிலான தொகுதிப் பங்கீடு பேச்சுவார்த்தைகள் மேலும் தீவிரமடையும் என்று அரசியல் வட்டாரங்கள் எதிர்பார்க்கின்றன.