தமிழக அரசியல் சூடுபிடித்திருக்கிறது. குறிப்பாக தவெக–காங்கிரஸ் கூட்டணி பற்றிய புது கணிப்புகள், வியூகங்கள் தொடர்ந்து இணையத்தையும், அரசியல் வட்டாரங்களையும் குலுக்கியவாறே உள்ளன. திமுக கூட்டணியில் தொடர்வோம் என்று ராகுல் காந்தியும், மல்லிகார்ஜுன கார்கேயும் தமிழக காங்கிரஸ் தலைவர்களிடம் தெளிவாக கூறி விட்டாலும், “சில கதர் தலைவர்கள்” மட்டும் விஜயின் தவெகவை நோக்கி திரும்பிப் பார்க்கிறார்கள் என்பதே அரசியல் பரபரப்பின் மையம்.

நீண்ட காலமாக திமுக கூட்டணியில் இருந்ததால், கொஞ்சமும் கைகொடுக்காத நிலை என்றும், முக்கிய முடிவுகளை எடுக்க முடியாத சூழல் என்றும் சில காங்கிரஸ் தலைவர்கள் அதிருப்தியில் இருக்கிறார்கள். திமுக–காங்கிரஸ் கூட்டணியில் இருந்தாலும், தமிழகத்தில் காங்கிரஸ் வளர்ச்சி காணவில்லை என்பதே அவர்களின் குற்றச்சாட்டு. இதனால் தான் தவெகவுடன் கூட்டணி வைப்பதே எதிர்கால வலிமை எனும் வாதம் உருவாகியுள்ளது.

ஒருவேளை காங்கிரஸ் தவெகவுடன் இணையாவிட்டால், அதிமுக–தவெக கூட்டணி உருவாகிவிடும் அபாயம் உள்ளது; அப்படி நடந்தால் திமுக கூட்டணியில் இருக்கும் காங்கிரஸுக்கு பெரிதாக பலன் இல்லையென்றும் அந்த "சில தலைவர்கள்" ராகுலிடம் வலியுறுத்தி வருகின்றனர். மேலும், விஜயின் பிரபலமும், கேரளா–புதுச்சேரி வரை பரவியுள்ள ரசிகர் வட்டாரமும் காங்கிரஸுக்கு புதிய வாய்ப்புகளைத் தரக்கூடும் என்பதே அவர்களின் கணிப்பு.

அந்த “சலசலப்பு குழு” முன்வைக்கும் அரசியல் சமன்பாடுகள் இதோ:

புதுச்சேரி: 30 தொகுதிகளில் காங்கிரஸ் – 20 / தவெக – 10

கேரளா: 140 தொகுதிகளில் காங்கிரஸ் – 100 / தவெக – 40

தமிழகம்: காங்கிரஸ் – 50 / தவெக – 184

மேலும், காங்கிரஸ் முதல்வர் பதவியும், தவெக துணை முதல்வர் பதவியும் என்ற அதிகார பங்கீடும் பேசலாம் என்ற கருத்தையும் அவர்கள் கூறுகிறார்கள். விஜயை ராகுல் காந்தி கரூரில் சந்தித்தது, பிரவீன் சக்ரவர்த்தியின் விஜயைக்குறித்த பாராட்டு பதிவுகள், திருச்சி வேலுசாமி விஜயின் தந்தை SAC-ஐ சந்தித்தது போன்றவை இந்த யூகங்களுக்கு மேலும் ஊக்கம் அளித்துள்ளன.

ஆனால், அரசியல் நிபுணர்கள் ஒரே கருத்தில் உள்ளனர்:“காங்கிரஸ் திமுக கூட்டணியை விட்டு சென்றுவிட வாய்ப்பே குறைவு.”

காரணம் தெளிவானது — திமுக கூட்டணியில் 3 முறை தேர்வுகளை வென்ற அனுபவம் காங்கிரஸிடம் உள்ளது. தவெக வாக்கு வங்கி இன்னும் கணிக்க முடியாதது; அப்படியிருக்க இத்தனை பெரிய ஆபத்தை காங்கிரஸ் எடுக்காது என்பதே நிபுணர்களின் நிலை.

அரசியல் சூழல் நாளுக்கு நாள் மாறிக்கொண்டே இருக்கும் நிலையில், காங்கிரஸ்–தவெக கூட்டணிக்கான பேச்சுவார்த்தை உண்மையில் உருவாகுமா? அல்லது இது வெறும் அரசியல் யூகங்களா? என்பது இன்னும் பெரிய கேள்விக்குறியாகவே உள்ளது.பொறுத்திருந்து பார்ப்போம் — தமிழக அரசியலில் எந்த நேரத்திலும் திருப்பங்கள் வருவது வழக்கம்!