மதுரையில் இன்று செய்தியாளர்களைச் சந்தித்த முன்னாள் அதிமுக அமைச்சர் செல்லூர் கே. ராஜு, ஓ.பி.எஸ்-ன் அரசியல் நிலை மற்றும் திமுக அரசின் செயல்பாடு குறித்துத் தனது பாணியில் காரசாரமான கருத்துகளைப் பகிர்ந்துள்ளார்.

ஓ.பி.எஸ் மீதான விமர்சனம்: "ஓ.பி.எஸ்-க்கு அரசியல் எதிர்காலம் கிடையாது; அவர் தற்போது அனாதையாக நிற்கிறார். அவருடன் இருந்தவர்கள் அனைவரும் எடப்பாடி பழனிசாமி பக்கம் வந்துவிட்டனர். அவர் பாவம் என்ன செய்வார்?" எனச் சாடினார்.

திமுகவின் இரட்டை வேடம்: எதிர்க்கட்சியாக இருந்தபோது பிரதமருக்கு 'கோ பேக் மோடி' காட்டிய திமுக, இப்போது அதே பிரதமரை வெள்ளைக்குடை பிடித்து வரவேற்பது ஏன் எனக் கேள்வி எழுப்பினார்.

பொருளாதாரப் பாதிப்பு: மின்கட்டண உயர்வால் மதுரையில் உள்ள வியாபாரிகளும், தொழில் முனைவோரும் கடும் நஷ்டமடைந்துள்ளதாகவும், அதிமுக ஆட்சி எப்போது வரும் என அவர்கள் ஏங்குவதாகவும் தெரிவித்தார்.

அரசியல் கூட்டங்களுக்குக் கூடும் மக்கள் கூட்டம் ஓட்டாக மாறாது என்பதைச் சுட்டிக்காட்டிய அவர், "நடிகர் சிவாஜி கணேசன், அடுக்கு மொழியில் பேசிய டி.ராஜேந்தர், பாக்யராஜ் போன்றோருக்குப் பிரம்மாண்ட கூட்டம் கூடியது; ஆனால் அது ஓட்டாக மாறவில்லை" என்றார். எடப்பாடி பழனிசாமி 200-க்கும் மேற்பட்ட தொகுதிகளில் மக்களைச் சந்தித்து எழுச்சியை உருவாக்கி வருவதாகப் புகழ்ந்தார்.

சசிகலாவின் புதிய கட்சித் தொடக்கம் குறித்த கேள்விக்கு, தான் காலையிலிருந்து ஒரு நிகழ்ச்சியில் இருந்ததால் அதுகுறித்த செய்திகளை இன்னும் பார்க்கவில்லை எனக் கூறி செல்லூர் ராஜு நழுவிக் கொண்டார்.