அதிமுகவில் இருந்து எம்எல்ஏ பதவியை ராஜினாமா செய்து தமிழக வெற்றிக் கழகத்தில் இணைந்தவர்களுக்கு மீண்டும் வாய்ப்பு வழங்குவது குறித்து முதல்வர் விஜய்தான் முடிவு செய்வார் என்று தமிழக சட்டத்துறை அமைச்சர் சிடிஆர் நிர்மல் குமார் தெரிவித்துள்ளார். அதேநேரத்தில், அரசு என்பது முதல்வர், அமைச்சர்கள், அதிகாரிகள் மற்றும் சட்டமன்ற உறுப்பினர்களால் நடத்தப்பட வேண்டுமே தவிர, முதல்வருக்கு நெருக்கமான தனிப்பட்ட நபர்கள் அல்லது நண்பர்களால் நடத்தப்படக்கூடாது என்றும் அவர் கடுமையாக விமர்சித்துள்ளார்.

சென்னை ராஜீவ் காந்தி அரசு பொது மருத்துவமனையில் சிகிச்சை பெற்று வரும் இந்திய கம்யூனிஸ்ட் கட்சியின் தேசிய பொதுச்செயலாளர் டி.ராஜாவை அமைச்சர் சிடிஆர் நிர்மல் குமார் நேரில் சந்தித்து அவரது உடல்நிலை குறித்து கேட்டறிந்தார். இதனைத் தொடர்ந்து செய்தியாளர்களை சந்தித்த அவர், கூட்டணி அரசியல், முன்னாள் திமுக ஆட்சி மற்றும் ரத்தீஷ் உள்ளிட்டோர் தொடர்பான பல்வேறு விவகாரங்கள் குறித்து கருத்து தெரிவித்தார்.

இன்று நடைபெறும் தவெக கூட்டணி கட்சிகளின் ஆலோசனைக் கூட்டத்தில் கம்யூனிஸ்ட் கட்சிகள் பங்கேற்கவில்லை என்ற தகவல் குறித்து கேள்வி எழுப்பப்பட்டது. அதற்கு பதிலளித்த நிர்மல் குமார், தேர்தல் நேரத்தில்தான் அரசியல் கட்சிகளுடன் தொகுதி மற்றும் கூட்டணி உடன்பாடுகள் ஏற்படும் என்றும், திமுகவுடனும் கம்யூனிஸ்ட் கட்சிகள் இதேபோன்ற அணுகுமுறையையே கடைப்பிடித்ததாகவும் தெரிவித்தார்.

அதேநேரத்தில், கம்யூனிஸ்ட் கட்சிகள் தற்போதைய அரசுக்கு ஆதரவு அளிப்பதாக தெரிவித்துள்ளதால், மக்கள் நலத்திட்டங்கள் மற்றும் ஆட்சியின் செயல்பாடுகளில் எந்த மாற்றமும் இருக்காது என்றும் அவர் கூறினார்.

தமிழகத்தில் கடந்த ஆட்சிக்காலத்தில் பல்வேறு துறைகள் மோசமான நிலையில் இருந்ததாக குற்றம்சாட்டிய நிர்மல் குமார், எந்த நிலையில் இருந்து அரசை மீட்டு வருகிறோம் என்பதை மக்களுக்கு விளக்க வேண்டிய கட்டாயம் இருப்பதாக தெரிவித்தார்.

“எல்லாத் துறையும் எப்படி உள்ளது, எவ்வளவு மோசமாக உள்ளது என்பதை சொல்லித்தான் ஆக வேண்டும். எவ்வளவு தூரம் மக்களை ஏமாற்றிக் கொண்டிருக்கிறார்கள் என்பதை இன்றைய தலைமுறைக்கு தெரியப்படுத்த வேண்டும்” என்றார்.

காவிரி விவகாரம் உள்ளிட்ட பல்வேறு பிரச்சினைகளிலும் கடந்த காலங்களில் என்ன தவறுகள் நடைபெற்றன என்பதை மக்களுக்கு எடுத்துச் சொல்ல வேண்டியுள்ளதாகவும் அவர் தெரிவித்தார்.

கச்சத்தீவு விவகாரம் குறித்தும் நிர்மல் குமார் கடுமையான விமர்சனங்களை முன்வைத்தார். சர்க்காரியா கமிஷன், சிபிஐ வழக்கு உள்ளிட்ட விவகாரங்களை சுட்டிக்காட்டிய அவர், கச்சத்தீவு தொடர்பாக கடந்த காலத்தில் எடுக்கப்பட்ட முடிவுகள் குறித்து பல்வேறு கேள்விகளை எழுப்பினார்.

மேலும், இந்த விவகாரம் தொடர்பாக அப்போது உரிய நடவடிக்கை எடுக்கப்பட்டிருந்தால், தமிழக மீனவர்கள் பல ஆண்டுகளாக பாதிக்கப்பட்டிருக்க வேண்டிய நிலை ஏற்பட்டிருக்காது என்றும் அவர் கூறினார்.

இதற்கிடையே, முதல்வர் விஜய் சட்டப்பேரவையில் குறிப்பிட்டதாக கூறப்படும் ரத்தீஷ் விவகாரம் குறித்து அமைச்சர் நிர்மல் குமார் விரிவாக பேசினார்.

ரத்தீஷ் மீது முதல் தகவல் அறிக்கை பதிவு செய்யப்பட்டவுடன் அவருக்கு காவல்துறை சார்பில் நோட்டீஸ் அனுப்பப்பட்டுள்ளதாகவும், இந்த விவகாரத்தில் காவல்துறை நடைமுறைக்கு ஏற்ப நடவடிக்கை மேற்கொண்டு வருவதாகவும் அவர் தெரிவித்தார்.

ரத்தீஷின் பெயரை முதல்வர் ஏன் குறிப்பிட்டார் என்பதற்கான காரணத்தையும் நிர்மல் குமார் விளக்கினார்.

“அரசை முதலமைச்சர், அமைச்சர்கள், சட்டமன்ற உறுப்பினர்கள், அதிகாரிகள் நடத்தலாம். ரத்தீஷ் போன்ற தனிப்பட்ட நபர்களோ, மாப்பிள்ளையுடன் இருக்கும் நண்பர்களோ அரசை நடத்தக்கூடாது” என்று அவர் கூறினார்.

மேலும், தனிப்பட்ட நபர்கள் அதிகாரிகளை சந்தித்து அரசு நிர்வாகத்தில் தலையிட்டதாகவும், சிலர் வசூல் நடவடிக்கைகளில் ஈடுபட்டதாகவும் அமைச்சர் குற்றம்சாட்டினார்.

“அரசை ரத்தீஷ் என்பவர் நடத்துவது, அதிகாரிகள் அவரை பார்ப்பது, 10 பேர் அமர்ந்து கொண்டு குறைகளை பிரித்துக் கொண்டு வசூல் செய்வது” போன்ற செயல்கள் நடைபெற்றதாக அவர் விமர்சித்தார்.

மேலும், அரசியல் மற்றும் மக்கள் பிரச்சினைகள் குறித்து புரிதல் இல்லாதவர்களை முக்கியமான அதிகார மையங்களாக மாற்றியிருந்ததாகவும், டாஸ்மாக் உள்ளிட்ட துறைகளில் வசூல் செய்ததாக கூறப்படும் “பவர் புரோக்கர்கள்” மூலம் நிர்வாகம் நடத்தப்பட்டதாகவும் அவர் குற்றம்சாட்டினார்.

தொடர்ந்து பேசிய நிர்மல் குமார், முதல்வர் விஜய் தலைமையிலான அரசு தற்போது நிர்வாகத்தில் புரையோடியுள்ளதாக கூறப்படும் அமைப்புகளை மாற்றும் பணியில் ஈடுபட்டு வருவதாக தெரிவித்தார்.

“எதிலிருந்து மீட்கிறோம் என்பதை மக்களுக்கு தெரிய வேண்டும். புரையோடி உள்ள சிஸ்டங்களை மாற்றுகிறோம் என்பதை மக்களுக்கு தெரியப்படுத்த வேண்டும்” என்று அவர் கூறினார்.

அதிமுகவில் இருந்து விலகி தவெகவில் இணைந்த முன்னாள் எம்எல்ஏக்களுக்கு மீண்டும் தேர்தலில் வாய்ப்பு வழங்கப்படுமா என்ற கேள்விக்கு, அதுகுறித்து முதல்வர் விஜய்தான் முடிவு செய்வார் என்றும் அமைச்சர் சிடிஆர் நிர்மல் குமார் தெரிவித்தார். அவரது பேச்சு தமிழக அரசியல் வட்டாரங்களில் தற்போது கவனம் பெற்றுள்ளது.