தமிழக முதலமைச்சரும், தமிழக வெற்றிக் கழகத்தின் தலைவருமான விஜய், வருகிற ஜூன் 22-ஆம் தேதி தனது பிறந்தநாளை கொண்டாட உள்ளார். முதல்-அமைச்சராக பொறுப்பேற்ற பிறகு கொண்டாடப்படும் முதல் பிறந்தநாள் என்பதால், அதை மாநிலம் முழுவதும் சிறப்புமிக்க மக்கள் நல விழாவாக மாற்ற கட்சி நிர்வாகிகள் தீவிர ஆலோசனையில் ஈடுபட்டுள்ளனர்.

இதுதொடர்பான முக்கிய ஆலோசனைக் கூட்டம், கட்சியின் பொதுச் செயலாளரும் அமைச்சருமான என். ஆனந்த் தலைமையில் சென்னை பனையூரில் உள்ள கட்சித் தலைமையகத்தில் நடைபெற்றது.

இதில் சட்டமன்ற உறுப்பினர்கள், மாவட்டச் செயலாளர்கள் மற்றும் முக்கிய நிர்வாகிகள் பங்கேற்று பிறந்தநாள் நிகழ்வுகள் குறித்து விரிவாக ஆலோசனை நடத்தினர்.கூட்டத்தில் பேசிய அமைச்சர் என். ஆனந்த், விஜயின் பிறந்தநாளை வெறும் கொண்டாட்ட நிகழ்வாக அல்லாமல் சமூகப் பொறுப்புணர்வை வெளிப்படுத்தும் நாளாக மாற்ற வேண்டும் என வலியுறுத்தினார்.

ஏழை, எளிய மக்களுக்கு நலத்திட்ட உதவிகள் வழங்குதல், இலவச மருத்துவ முகாம்கள் நடத்துதல், ரத்ததான முகாம்கள் அமைத்தல், அன்னதான நிகழ்ச்சிகள் ஏற்பாடு செய்தல் உள்ளிட்ட மக்கள் நல நடவடிக்கைகளை முன்னிலைப்படுத்த வேண்டும் என அறிவுறுத்தினார்.

மேலும், பொதுமக்களின் இயல்பு வாழ்க்கைக்கு எந்தவித இடையூறும் ஏற்படாத வகையில் அனைத்து நிகழ்வுகளும் அமைதியாகவும், ஒழுங்காகவும் நடத்தப்பட வேண்டும் என அறிவுறுத்தப்பட்டது.

குறிப்பாக, விஜயின் நேரடி வழிகாட்டுதலின்படி கட்சி நிர்வாகிகள் யாரும் பேனர்கள், கட்-அவுட்கள், பிரம்மாண்ட விளம்பர பலகைகள் போன்றவற்றை அமைக்கக் கூடாது என அமைச்சர் என். ஆனந்த் திட்டவட்டமாக தெரிவித்தார். மக்கள் சேவையே முக்கியம்; விளம்பர அரசியல் அல்ல என்பதே கட்சியின் அடிப்படை நிலைப்பாடு என்றும் அவர் வலியுறுத்தினார்.

தமிழக வெற்றிக் கழகத்தில் பேனர் கலாசாரத்திற்கு இடமில்லை என்ற கொள்கை தொடர்ந்து பின்பற்றப்படும் என்றும், விஜயின் பிறந்தநாள் மக்கள் நல சேவைகளின் திருவிழாவாக அமைய வேண்டும் என்றும் கூட்டத்தில் முடிவு செய்யப்பட்டுள்ளதாக தெரிவிக்கப்படுகிறது.