தமிழக அரசியலில் தேர்தல் களத்தின் வெப்பம் நாளுக்கு நாள் உயரும் நிலையில், இந்த ஆண்டு ஏப்ரல் மாதம் நடைபெற உள்ள சட்டசபைத் தேர்தல் அரசியல் வட்டாரங்களை பரபரப்பில் ஆழ்த்தியுள்ளது. ஆளும் தி.மு.க. ஆட்சியை தக்கவைத்துக்கொள்ள தீவிரமாக களமிறங்கியிருக்க, எதிரணியான அ.தி.மு.க. மீண்டும் அதிகாரத்தை கைப்பற்ற முழுவீச்சில் வியூகம் வகுத்து வருகிறது.

ஆளுங்கட்சியான தி.மு.க. தலைமையிலான கூட்டணியில் காங்கிரஸ், ம.தி.மு.க., கம்யூனிஸ்ட் கட்சிகள், விடுதலைச் சிறுத்தைகள், இந்திய யூனியன் முஸ்லீம் லீக், மக்கள் நீதி மய்யம் உள்ளிட்ட பல கட்சிகள் அணிவகுத்து நிற்கின்றன.

இதற்கிடையே, சீமான் தலைமையிலான நாம் தமிழர் கட்சி தனித்துப் போட்டியிடுவதாக அறிவித்து அரசியல் மேடையில் தனி பாதையைத் தேர்ந்தெடுத்துள்ளது.புதிய அரசியல் நுழைவாக, நடிகர் விஜய் தலைமையிலான தமிழக வெற்றிக் கழகம் கூட்டணிக்கு அழைப்பு விடுத்தாலும், “முதல்வர் வேட்பாளர் விஜய்தான்” என்ற நிலைப்பாட்டில் உறுதியாக இருப்பதால் அரசியல் சமன்பாடுகள் மேலும் சுவாரஸ்யம் பெற்றுள்ளன.

இந்த அரசியல் பின்னணியில், அ.தி.மு.க.–பா.ஜனதா கூட்டணியின் முதல் பிரசார பொதுக்கூட்டம் வருகிற 23-ந்தேதி மதுராந்தகத்தில் நடைபெறுகிறது. இதில் பிரதமர் நரேந்திர மோடி பங்கேற்று தேர்தல் சூட்டை ஏற்றவுள்ளார். கூட்டணி கட்சித் தலைவர்கள் மேடையேற உள்ளதால், இறுதி கூட்டணி அமைப்பதற்கான முயற்சிகள் தற்போது அதிவேகமாக முன்னேறி வருகின்றன.

தற்போதுவரை அ.தி.மு.க.–பா.ஜனதா அணியில் பா.ம.க. (அன்புமணி), த.மா.கா., புதிய நீதிக்கட்சி, இந்திய ஜனநாயக கட்சி ஆகியவை இடம் பெற்றுள்ளன. மேலும், தே.மு.தி.க., அ.ம.மு.க. ஆகிய கட்சிகளை இணைக்க தீவிர முயற்சிகள் நடைபெற்று வருகின்றன.இந்த நிலையில், இன்று (புதன்கிழமை) தே.மு.தி.க. உடன் பா.ஜனதா மேலிட பொறுப்பாளரும், மத்திய அமைச்சருமான பியூஸ் கோயல் கூட்டணி பேச்சுவார்த்தை நடத்தவுள்ளதாக தகவல்கள் வெளியாகியுள்ளன.

அதேபோல் டி.டி.வி. தினகரன் உடனும் ஆலோசனை நடைபெற உள்ளது. இரு கட்சிகளுடனும் கூட்டணி உறுதி செய்யப்பட்டால், அவர்களின் தலைவர்கள் 23-ந்தேதி நடைபெறும் பிரசார பொதுக்கூட்ட மேடையில் பங்கேற்பார்கள் என எதிர்பார்ப்பு நிலவுகிறது.

கூட்டணி முடிவாகியவுடன், எந்தக் கட்சிக்கு எத்தனை இடங்கள் என்பது குறித்த ஒப்பந்தங்கள் உடனடியாக கையெழுத்தாகும் என்றும், பியூஸ் கோயல் முன்னிலையில் அ.தி.மு.க. பொதுச் செயலாளர் எடப்பாடி பழனிசாமி கூட்டணி கட்சிகளுடன் இடப் பங்கீடு ஒப்பந்தத்தில் கையெழுத்திடவுள்ளதாகவும் அரசியல் வட்டாரங்கள் தெரிவிக்கின்றன.தமிழக அரசியல் களம்… இப்போது முழுமையாக தேர்தல் போர்க்களமாக மாறி வருகிறது.