திமுக–காங்கிரஸ் கூட்டணியில் கருத்து வேறுபாடுகள் நிலவி வரும் சூழலில், விருதுநகர் எம்.பி. மாணிக்கம் தாகூர் திடீரென முதலமைச்சர் மு.க. ஸ்டாலினை புகழ்ந்து பேசியிருப்பது அரசியல் வட்டாரங்களில் கவனம் பெற்றுள்ளது.

விருதுநகர் மாவட்டம் சிவகாசியில் செய்தியாளர்களை சந்தித்த மாணிக்கம் தாகூரிடம், ‘இந்தியா’ கூட்டணியின் தலைமை குறித்து மணிசங்கர் அய்யர் வெளியிட்ட கருத்து பற்றி கேள்வி எழுப்பப்பட்டது. அதற்கு பதிலளித்த அவர், “மணிசங்கர் அய்யர் தற்போது காங்கிரஸ் கட்சியில் இல்லை. அவரது கருத்தை சீரியஸாக எடுத்துக்கொள்ள வேண்டிய அவசியம் இல்லை. அவர் பல்வேறு மாநிலங்களில் வெவ்வேறு கருத்துகளை கூறுவார்,” என்றார்.

அதே நேரத்தில், “தமிழகத்தின் முதல்வர் ஸ்டாலின் ‘இந்தியா’ கூட்டணியில் மிக முக்கிய அங்கம் வகிப்பவர். எதிர்க்கட்சித் தலைவர்களிலேயே மிகவும் முக்கியமான தலைவர்,” என அவர் தெரிவித்தது குறிப்பிடத்தக்கது.

சமீபத்தில் தமிழகத்தில் கூட்டணி ஆட்சி ஒத்துவராது என்று முதல்வர் ஸ்டாலின் தெரிவித்திருந்த நிலையில், அதற்கு மாணிக்கம் தாகூர் மறைமுகமாக பதிலடி கொடுத்ததாக அரசியல் வட்டாரங்களில் பேசப்பட்டது. 2006 ஆம் ஆண்டு காங்கிரஸ் ஆதரவில் திமுக ஆட்சி அமைந்ததை சுட்டிக்காட்டி, “அதை மக்கள் தீர்மானிப்பார்கள்” என அவர் கூறியிருந்தது நினைவுகூரப்படுகிறது.

இந்த பின்னணியில், தற்போது ஸ்டாலினை “மிக மிக முக்கியமான தலைவர்” என புகழ்ந்திருப்பது கூட்டணியில் நிலவும் பதற்றத்தை சமன் செய்யும் முயற்சியாக பார்க்கப்படுகிறது.

மேலும், ‘இந்தியா’ கூட்டணியைப் பற்றிய சீமான் கருத்து குறித்து கேட்கப்பட்டபோது, “அண்ணன் சீமான் ‘இந்தியா’ கூட்டணியில் இல்லை. வெளியே இருப்பவர்கள் கருத்து சொல்வது வழிப்போக்கர்களின் கருத்து போன்றது,” என விமர்சித்தார். நாம் தமிழர் கட்சி குறித்து, “கடந்த முறை 8 சதவீதம் ஓட்டு பெற்றார். இந்த முறை எவ்வளவு பெறுகிறார் என்பதைப் பார்ப்போம்; அதன் பிறகு பேசலாம்,” என்றும் அவர் குறிப்பிட்டார்.

மொத்தத்தில், திமுக–காங்கிரஸ் இடையே நிலவி வரும் கருத்து வேறுபாடுகளுக்கு மத்தியில் மாணிக்கம் தாகூரின் இந்த திடீர் மென்மையான அணுகுமுறை, கூட்டணி அரசியலில் புதிய மாற்றத்திற்கான சைகையாக பார்க்கப்படுகிறது.