திருப்பரங்குன்றம் மலையில் உள்ள தீபத்தூணில் தீபம் ஏற்ற அனுமதி வழங்கிய நீதிபதி ஜி.ஆர்.சுவாமிநாதனின் உத்தரவுக்கு எதிரான மேல்முறையீட்டு மனு, உயர் நீதிமன்ற மதுரைக் கிளையில் நீதிபதிகள் ஜெயச்சந்திரன் மற்றும் ராமகிருஷ்ணன் ஆகியோர் கொண்ட அமர்வு முன் இன்று (டிசம்பர் 12) விசாரணைக்கு வந்தது.

நீதிபதிகள் அறிவுரை:

வழக்கு விசாரணைக்கு வருவதற்கு முன்பே இடையீட்டு மனு தாக்கல் செய்ய அனுமதி கோரிய மனுதாரரிடம், "திருப்பரங்குன்றம் பிரச்சினைக்கு உண்மையிலேயே தீர்வு காண வேண்டுமெனில் அமைதியாக இருங்கள்" என்று நீதிபதிகள் அறிவுறுத்தினர். மேலும், இடையீட்டு மனு தாக்கல் செய்ய அனுமதி மறுத்து, அமைதி காக்குமாறு மனுதாரருக்குக் கூறினர்.

தமிழக அரசு வாதம்:

தமிழக அரசுத் தரப்பில் வாதாடிய வழக்கறிஞர், இந்த ஆண்டு வழக்கம்போல் உச்சிப்பிள்ளையார் கோவில் மண்டபத்தில்தான் கார்த்திகை தீபம் ஏற்றப்பட்டது என்று தெரிவித்தார்.

தீபத்தூண் இல்லை: மலையில் இருப்பது தீபத்தூண் அல்ல, எல்லைக்கல் தான் என்று அரசு தரப்பு வாதிட்டது.

73 ஆண்டு வழக்கம்: 73 ஆண்டுகளாக ஒரே இடத்தில்தான் தீபம் ஏற்றப்பட்டு வருகிறது. உச்சிப்பிள்ளையார் கோவிலில் உள்ள தீபத்தூணில் தான் தீபம் ஏற்றுவது வழக்கம்.

தனி நீதிபதி உத்தரவு: கோவில் நிர்வாகத்துடன் தொடர்பில்லாத ஒருவரின் மனுவைப் பொதுநல வழக்கு போலப் பாவித்து தனி நீதிபதி தீர்ப்பு அளித்துள்ளார்.

சட்டம்-ஒழுங்கு: தனி நீதிபதி உத்தரவால் நிலவிய சீரற்ற நிலையைச் சீர் செய்யவே 144 தடை உத்தரவு பிறப்பிக்கப்பட்டது. 1912-க்குப் பிறகு இங்கு இருமுறை மதப்பிரச்சினை எழுந்துள்ளது.

நீதிமன்றக் கேள்வி:

அரசு தரப்பு வாதத்தைக் கேட்ட நீதிபதிகள், "மலையில் சர்வே நடத்தியதில் அங்கு இருப்பது தீபத்தூண் தான் என உறுதி செய்தீர்களா?" என்று கேள்வி எழுப்பினர். அதற்கு அரசு தரப்பு, மலையில் உள்ள நெல்லித்தோப்பு, தர்கா உள்ளிட்டவை தர்காவுக்குச் சொந்தமானவை என்று பதிலளித்தது.