விருத்தாசலம் சட்டமன்றத் தொகுதியில் போட்டியிடும் தேமுதிக பொதுச்செயலாளர் பிரேமலதா விஜயகாந்த், தனது தேர்தல் பிரச்சார நடவடிக்கைகளில் விடுதலைச் சிறுத்தைகள் கட்சியை (விசிக) திட்டமிட்டுப் புறக்கணித்து வருவது திமுக தலைமையிலான கூட்டணியில் பெரும் விரிசலை ஏற்படுத்தியுள்ளது. 

குறிப்பாக, தொகுதியின் பல்வேறு இடங்களில் வரையப்பட்டுள்ள சுவர் விளம்பரங்களில் கூட்டணி கட்சிகளான திமுக, காங்கிரஸ் ஆகியவற்றின் சின்னங்கள் மற்றும் தலைவர்களின் பெயர்கள் இடம்பெற்றுள்ள நிலையில், விசிக-வின் பெயர், கொடி மற்றும் அக்கட்சியின் தலைவர் திருமாவளவனின் பெயர் முற்றிலுமாகத் தவிர்க்கப்பட்டுள்ளது பெரும் சர்ச்சையாக மாறியுள்ளது.

திமுக கூட்டணியில் தேமுதிக இணைந்தது முதல், அவர்களுக்கு 10 தொகுதிகள் ஒதுக்கப்பட்டது விசிக உள்ளிட்ட மற்ற சிறிய கூட்டணிக் கட்சிகளிடையே அதிருப்தியை ஏற்படுத்தியிருந்தது. 

இந்தப் பின்னணியில், அண்மையில் கடலூரில் நடைபெற்ற தேர்தல் பிரச்சாரக் கூட்டத்தின் போது, திருமாவளவன் மேடையில் வேட்பாளர்களை அறிமுகம் செய்து உரையாற்றினார். அப்போது பிரேமலதா விஜயகாந்த் எழுந்து நின்று மரியாதை அளிக்காமல், முகத்தில் கையை வைத்துக்கொண்டு ஏளனமாகச் சிரித்த வீடியோ காட்சிகள் சமூக வலைதளங்களில் வைரலாகின. இது விசிக தொண்டர்களிடையே ஏற்கனவே கடும் கொந்தளிப்பை ஏற்படுத்தியிருந்தது.

அந்தக் கசப்புணர்வுகள் தணியும் முன்பே, தற்போது விருத்தாசலம் தொகுதி சுவர் விளம்பரங்களிலும் விசிக அவமதிக்கப்பட்டுள்ளதாகத் தொண்டர்கள் குற்றம் சாட்டுகின்றனர். 

விசிக-வை இதுபோன்று கூட்டணிக் கட்சிகளே புறக்கணிப்பது இது முதல் முறையல்ல; ஏற்கனவே திமுக வேட்பாளர் அப்பாவு தனது பிரச்சாரத்தில் விசிக-வை தவிர்த்திருந்தது குறிப்பிடத்தக்கது. இத்தகைய தொடர்ச்சியான புறக்கணிப்புகள், தலித் மக்களின் வாக்குகளைக் குறிவைக்கும் விசிக-வின் அடிமட்டத் தொண்டர்களைத் தேர்தல் பணிகளிலிருந்து அந்நியப்படுத்தும் என அஞ்சப்படுகிறது.

தேர்தல் நெருங்கும் வேளையில், கூட்டணிக் கட்சிகளுக்கு இடையே நிலவ வேண்டிய ஒருமைப்பாடு காணாமல் போய், ஈகோ மோதல்கள் வந்துள்ளன. பிரேமலதாவின் இந்தச் செயல் விசிக தலைமையை அவமதிக்கும் செயல் என்று அக்கட்சியினர் சமூக வலைதளங்களில் கண்டனம் தெரிவித்து வருகின்றனர். இந்த விவகாரம் திமுக தலைமைக்குத் தலைவலியை ஏற்படுத்தியுள்ள நிலையில், இது வாக்குப் பதிவில் பாதிப்பை ஏற்படுத்துமா என்பதைப் பொறுத்திருந்துதான் பார்க்க வேண்டும்.

விசிகவினரை முழுவதுமாக தவிர்த்த பிரேமலதா,

இந்த அவமானத்தையும் மீறி தேமுதிகவுக்கு வாக்களிப்பீர்களா.. விசிகவினரே pic.twitter.com/QGGVydR7SR

— Pallavas 🦁 🥭 (@CholaPallavan) April 12, 2026