வரும் சட்டசபைத் தேர்தலை முன்னிட்டு, அதிமுக தலைமையிலான தேசிய ஜனநாயகக் கூட்டணியை (NDA) முழுமையாக கட்டமைக்கும் பணிகள் தீவிரமடைந்துள்ள நிலையில், அமமுக பொதுச்செயலாளர் டிடிவி தினகரன் டெல்லியில் மத்திய உள்துறை அமைச்சர் அமித்ஷாவை சந்தித்து பேச்சுவார்த்தை நடத்தியதாக தகவல்கள் வெளியாகியுள்ளன. இந்த சந்திப்பில், என்டிஏ கூட்டணியில் அமமுக இணைவது தொடர்பாகவும், தொகுதி பங்கீடு குறித்தும் முக்கிய ஆலோசனைகள் நடைபெற்றதாக கூறப்படுகிறது.

சட்டசபைத் தேர்தலுக்கு இன்னும் சில மாதங்களே உள்ள சூழலில், அதிமுக கூட்டணியை வலுப்படுத்தும் முயற்சியில் பாஜக தீவிரமாக செயல்பட்டு வருகிறது. ஏற்கனவே பாமக அதிமுக கூட்டணியில் இணைந்துள்ள நிலையில், அடுத்த கட்டமாக அமமுக, புதிய நீதிக் கட்சி, ஐஜேகே உள்ளிட்ட சிறிய கட்சிகளுடன் பேச்சுவார்த்தைகள் நடைபெற்று வருகின்றன. இந்த பின்னணியில்தான் டிடிவி தினகரன் – அமித்ஷா சந்திப்பு அரசியல் வட்டாரங்களில் கவனம் பெற்றுள்ளது.

தகவலறிந்த வட்டாரங்களின் படி, என்டிஏ கூட்டணியில் அமமுகவுக்கு குறைந்தது 10 சட்டசபைத் தொகுதிகள் ஒதுக்க வேண்டும் என்ற கோரிக்கையை டிடிவி தினகரன் முன்வைத்துள்ளார். கடந்த நாடாளுமன்றத் தேர்தலில் அமமுக 2 தொகுதிகளில் மட்டுமே போட்டியிட்ட நிலையில், இம்முறை சட்டசபைத் தேர்தலில் அதிக பிரதிநிதித்துவம் அவசியம் என்ற அடிப்படையில் இந்த கோரிக்கை வைக்கப்பட்டதாக கூறப்படுகிறது.

முன்னதாக, அதிமுக பொதுச்செயலாளர் எடப்பாடி பழனிசாமி, டிடிவி தினகரனை என்டிஏ கூட்டணிக்குள் சேர்ப்பதற்கு ஒப்புதல் அளித்துள்ளதாகவும், இதை அவர் பொதுவெளியிலும் உறுதி செய்திருந்தார். ஆனால், பாஜக தரப்பில், அமமுக, புதிய நீதிக் கட்சி (ஏசி சண்முகம்), ஐஜேகே (பாரிவேந்தர்) உள்ளிட்ட கட்சிகளுக்கும் சேர்த்து பாஜகவுக்கு ஒதுக்க வேண்டிய தொகுதிகள் குறித்து ஆலோசிக்கப்பட்டது. இதன்படி, பாஜக தரப்பில் மொத்தமாக 56 தொகுதிகள் மற்றும் 3 அமைச்சரவை பதவிகள் கோரப்பட்டதாகவும், இதில் அமைச்சரவை பதவிகள் குறித்து மட்டும் எடப்பாடி பழனிசாமி ஆட்சேபணை தெரிவித்ததாகவும் கூறப்படுகிறது.

டெல்லியில் முகாமிட்டுள்ள டிடிவி தினகரன், அமித்ஷாவை சந்தித்த பிறகு அமமுகவுக்கான தொகுதி பங்கீடு தொடர்பான பேச்சுவார்த்தை ஒரு கட்டத்திற்கு வந்துள்ளதாக தெரிகிறது. குறிப்பாக, அமமுகவுக்கு 10 தொகுதிகள் ஒதுக்கப்படும் பட்சத்தில், அவை பாஜகவுக்கு ஒதுக்கப்படும் தொகுதிகளில் உள்ஒதுக்கீடாக வழங்கப்படலாம் என்றும், இதற்கு எடப்பாடி பழனிசாமி தரப்பில் பெரிதான எதிர்ப்பு இல்லை என்றும் தகவல்கள் தெரிவிக்கின்றன.

இந்த பேச்சுவார்த்தைகளின் முடிவாக, என்டிஏ கூட்டணியில் அமமுக இணைவு மற்றும் தொகுதி பங்கீடு தொடர்பான அதிகாரப்பூர்வ அறிவிப்பு ஜனவரி மாத இறுதியில் வெளியாகும் என அரசியல் வட்டாரங்கள் எதிர்பார்க்கின்றன. இதன் மூலம், அதிமுக தலைமையிலான என்டிஏ கூட்டணி மேலும் உறுதியடையும் என்றும், தமிழக அரசியல் களம் இன்னும் சூடுபிடிக்கும் என்றும் கணிக்கப்படுகிறது.