தமிழ்நாட்டில் சட்டமன்றத் தேர்தல் நெருங்கி வரும் நிலையில், அரசியல் களம் தற்போது முன்னெப்போதும் இல்லாத அளவுக்கு சூடுபிடித்துள்ளது. பிரதான அரசியல் கட்சிகள் அனைத்தும் கூட்டணி கணக்குகள், தொகுதி பங்கீடு, தேர்தல் வியூகங்கள் என முழுவீச்சில் களமிறங்கியுள்ளன.

அந்த வரிசையில், இந்த தேர்தலில் அதிமுக–பாஜக கூட்டணி அதிகாரபூர்வமாக வலுப்பெற்று வருகிறது. தமிழக தேர்தல் பொறுப்பாளராக நியமிக்கப்பட்டுள்ள மத்திய அமைச்சர் பியூஷ் கோயல் தலைமையில், கூட்டணியை மேலும் விரிவுபடுத்தும் முயற்சிகள் தீவிரமாக நடைபெற்று வருகின்றன.

சில கட்சிகளுடன் இறுதிக்கட்ட பேச்சுவார்த்தை நடைபெறுவதாகவும் தகவல்கள் வெளியாகியுள்ளன.இந்த அரசியல் பின்னணியில், பாஜக தனது தேர்தல் முனைப்பை வெளிப்படுத்தும் வகையில், மத்திய உள்துறை அமைச்சர் அமித் ஷா இரண்டு நாள் பயணமாக திருச்சிக்கு வருகை தந்துள்ளார்.

புதுக்கோட்டையில் நடைபெற்ற “தமிழகம் தலைநிமிர, தமிழனின் பயணம்” என்ற பிரசார பயணத்தின் நிறைவு விழாவில் பங்கேற்ற அவர், திமுக அரசை கடுமையாக விமர்சித்தார். வரும் சட்டமன்றத் தேர்தலில் திமுக அரசை வீழ்த்த வேண்டும் என அவர் வெளிப்படையான அரசியல் அழைப்பை விடுத்தது, அரசியல் வட்டாரங்களில் பரபரப்பை ஏற்படுத்தியுள்ளது.

பின்னர் திருச்சி வந்த அமித் ஷா, கலெக்டர் அலுவலக சாலையில் உள்ள தனியார் நட்சத்திர ஓட்டலில் தங்கினார். அதற்கு முன்பாக நடைபெற்ற பாஜக மத்தியக்குழு கூட்டத்தில் பங்கேற்று, 2026 சட்டமன்றத் தேர்தலை இலக்காகக் கொண்டு அதிமுக–பாஜக கூட்டணி எடுக்கும் பாதை, தேர்தல் உத்திகள், வெற்றி வாய்ப்புள்ள தொகுதிகள் குறித்து விரிவான ஆலோசனைகளை வழங்கினார்.அன்றைய இரவு ஓய்வுக்குப் பிறகு, இன்று காலை ஆன்மிக பயணத்தை தொடங்கிய அமித் ஷா, முதலில் பஞ்சபூத ஸ்தலங்களில் நீர் ஸ்தலமாக போற்றப்படும் திருவானைக்காவல் ஜம்புகேஸ்வரர் கோவிலுக்கு சென்றார்.

காலை 9.15 மணியளவில் ஓட்டலில் இருந்து புறப்பட்ட அவர், டிவிஎஸ் டோல்கேட் – சென்னை பைபாஸ் சாலை – பஞ்சக்கரை வழியாக கோவிலுக்கு வந்தார்.கோவில் வளாகத்தில் அவருக்கு பூரண கும்ப மரியாதையுடன் சிறப்பான வரவேற்பு அளிக்கப்பட்டது.

தொடர்ந்து ஜம்புகேஸ்வரர் மற்றும் அகிலாண்டேஸ்வரி அம்மனை வழிபட்ட அவர், கோவில் பிரகாரங்களை வலம் வந்து, அதன் புராண பெருமைகள் குறித்து கேட்டறிந்தார். பின்னர் கோவில் நிர்வாகம் சார்பில் பிரசாதமும் நினைவுப்பரிசும் வழங்கப்பட்டது.அதன்பின், பூலோக வைகுண்டம் எனப் போற்றப்படும் ஸ்ரீரங்கம் ரெங்கநாதர் கோவிலுக்கு அவர் வருகை தந்தார்.

வைகுண்ட ஏகாதசி திருவிழா நடைபெற்று வரும் நிலையில், ரெங்கா ரெங்கா கோபுரம் அருகே பட்டர்கள் மாலை அணிவித்து பூரண கும்ப மரியாதையுடன் வரவேற்றனர். கோவிலுக்குள் சென்ற அமித் ஷா, சக்கரத்தாழ்வார் சன்னதி, மூலவர் சன்னதி மற்றும் தாயார் சன்னதியில் பயபக்தியுடன் வழிபாடு மேற்கொண்டார்.இதனைத் தொடர்ந்து, அவர் காரில் புறப்பட்டு மன்னார்புரம் ராணுவ மைதானத்தில் நடைபெற்ற “நம்ம ஊரு பொங்கல்” விழாவில் பங்கேற்றார்.

இந்த விழாவிற்காக, பிரதமர் மோடியின் சிறிய கட்அவுட், பிரமாண்ட மேடை, சுமார் 5,000 பேர் அமரும் வகையில் இருக்கை வசதிகள் ஏற்பாடு செய்யப்பட்டிருந்தன.விழாவில் 2,000 குடும்பங்கள் பங்கேற்று, 1,008 பானைகளில் ஒரே நேரத்தில் பொங்கல் வைக்கப்பட்டது. பெண்கள் பட்டுச் சேலைகளிலும், ஆண்கள் பட்டுவேட்டி–சட்டைகளிலும் பாரம்பரிய உடையில் குடும்பத்துடன் திரண்டு விழாவை களைகட்டச் செய்தனர்

பங்கேற்பாளர்களுக்கு செங்கரும்பு, மஞ்சள் கொத்து உள்ளிட்ட பாரம்பரிய பொருட்கள் வழங்கப்பட்டன.இந்த நிகழ்ச்சியில், அமித் ஷாவும் பட்டுவேட்டி, சட்டை அணிந்து தமிழ்ப் பண்பாட்டை மதிக்கும் வகையில் கலந்துகொண்டார்.

விழாவில் கலந்து கொண்ட அனைவருக்கும் அவர் தமிழில் பொங்கல் வாழ்த்துகளை தெரிவித்தது கவனம் ஈர்த்தது.இந்த நிகழ்ச்சியில் பாஜக மாநில தலைவர் நயினார் நாகேந்திரன், மாநில பொதுச்செயலாளர் கருப்பு முருகானந்தம், முன்னாள் ஆளுநர் தமிழிசை சவுந்தரராஜன் உள்ளிட்ட பல முக்கிய நிர்வாகிகள் பங்கேற்றனர்.