மதுரை மாநகராட்சியில் கடந்த நான்கு ஆண்டுகளில் சுமார் 400 கோடி ரூபாய் அளவிற்குப் பெரும் ஊழல் நடைபெற்றுள்ளதாகவும், இது குறித்து முறையான விசாரணை நடத்தப்படும் என்றும் தமிழக தகவல் தொழில்நுட்பத் துறை அமைச்சர் சி.டி.ஆர். நிர்மல் குமார் தெரிவித்துள்ளார். மதுரையில் இன்று செய்தியாளர்களைச் சந்தித்த அவர், புதிய தவெக அரசின் செயல்பாடுகள் மற்றும் அரசியல் சூழல்கள் குறித்துப் பல்வேறு முக்கியத் தகவல்களைப் பகிர்ந்து கொண்டார். அதில், 

ஊழல் விசாரணை: மதுரை மாநகராட்சியில் மக்களின் வரிப்பணம் திருடப்பட்டுள்ளது. இதுவரை விசாரிக்கப்படாமல் உள்ள இந்த ₹400 கோடி ஊழல் குறித்து முழுமையான விசாரணை நடத்தப்பட்டு, தவறு செய்தவர்கள் மீது நடவடிக்கை எடுக்கப்படும். ஊழலற்ற நிர்வாகமே முதல்வர் விஜய்யின் இலக்கு.

மக்களுக்கான திட்டங்கள்: பெண்களின் பாதுகாப்பிற்கான 'சிங்கப்பெண்' திட்டம் மற்றும் டாஸ்மாக் கடைகள் மூடல் போன்றவை அரசின் ஆக்கப்பூர்வமான தொடக்கம். பழைய அரசின் நல்ல திட்டங்களான 'மகளிர் உரிமைத் தொகை' போன்றவை எவ்விதத் தடையுமின்றித் தொடரும். வரும் பட்ஜெட்டில் இந்த உரிமைத் தொகை உயர்த்துவது குறித்து ஆலோசிக்கப்படும்.

நீட் தேர்வு எதிர்ப்பு: ஒரு தேர்வைக் கூட ஒழுங்காக நடத்தத் தெரியாத ஒன்றிய அரசின் நீட் தேர்வால் ஏழை மாணவர்களுக்கு எந்தப் பயனும் இல்லை. இது வெறும் வியாபாரமாகிவிட்டது. நீட் தேர்வை ரத்து செய்ய வேண்டும் என்பதில் எங்கள் அரசு உறுதியாக உள்ளது.

144 எம்.எல்.ஏ-க்களின் ஆதரவுடன் தவெக அரசு பலமாக உள்ளது. அதிமுகவில் இருந்து முக்கியத் தலைவர்கள் முதல்வரைச் சந்தித்ததில் தவறில்லை.

திமுக - அதிமுக ரகசிய முயற்சி: எடப்பாடி பழனிசாமியின் மகனும், உதயநிதி ஸ்டாலினும் இணைந்து 'திமுக-அதிமுக' கூட்டணி ஆட்சியை அமைக்க 100 சதவீதம் முயற்சி செய்தனர். ஆனால் அவர்களின் கூட்டணிக் கட்சிகள் அதற்குச் சம்மதிக்காததால் அந்தத் திட்டம் தோல்வியடைந்தது என்ற அதிரடித் தகவலையும் அமைச்சர் வெளியிட்டார்.

மதுரை மாநகராட்சியின் அடிப்படைத் தேவையான கழிவுநீர் கால்வாய் வசதிகள் படிப்படியாக மேம்படுத்தப்படும் என்றும், போதைப்பொருள் இல்லாத தமிழகத்தை உருவாக்க முதல்வர் விஜய் கடும் நடவடிக்கைகளை எடுப்பார் என்றும் அமைச்சர் உறுதியளித்தார். அமைச்சரின் இந்த ஊழல் புகார் மதுரை அரசியல் வட்டாரத்தில் பெரும் பரபரப்பை ஏற்படுத்தியுள்ளது.