தேர்தல் வெற்றி, தோல்வியை தீர்மானிப்பதில் இளைஞர்களின் பங்கு முக்கியமானதாக மாறியுள்ள நிலையில், அரசியல் கட்சிகளின் பிரசார யுக்திகளும் வேகமாக மாறி வருகின்றன. குறிப்பாக சமூக வலைதளங்கள், வாட்ஸ் அப், எக்ஸ் உள்ளிட்ட டிஜிட்டல் தளங்கள் மூலம் வாக்காளர்களை சென்றடையும் மெய்நிகர் பிரசாரம் முக்கியத்துவம் பெற்றுள்ளது. இந்த சூழலில் தமிழக வெற்றி கழகத்துக்காக ஆயிரக்கணக்கான வாட்ஸ் அப் குழுக்கள் பொதுத்தேர்தலுக்கு முன்பே திரைமறைவில் ஒருங்கிணைக்கப்பட்டதாக கூறப்படும் தகவல் தற்போது அரசியல் வட்டாரங்களில் கவனம் பெற்றுள்ளது.

விஜய் தலைமையிலான தவெக, கட்சி தொடங்கிய இரண்டு ஆண்டுகளிலேயே ஆட்சியைப் பிடித்ததாக கூறப்படும் நிலையில், பாரம்பரிய அரசியல் கட்சிகளின் வழக்கமான பிரசார முறைகளில் இருந்து மாறுபட்ட அணுகுமுறையை கையாண்டதாக அதன் ஆதரவாளர்கள் தெரிவிக்கின்றனர். குறிப்பாக சமூக வலைதளங்களில் கட்சிக்கான ஆதரவை உருவாக்குவதில் அதிக கவனம் செலுத்தப்பட்டதாக கூறப்படுகிறது.

தற்போது நடைபெறவுள்ள இடைத்தேர்தல்களிலும் இதே டிஜிட்டல் அணுகுமுறையை தவெக தொடர்ந்து பயன்படுத்தி வருவதாக அரசியல் வட்டாரங்களில் பேசப்படுகிறது. இதனைத் தொடர்ந்து திமுக, அதிமுக உள்ளிட்ட பாரம்பரிய கட்சிகளும் சமூக வலைதளங்களில் தங்களது செயல்பாடுகளை தீவிரப்படுத்தத் தொடங்கியுள்ளதாக கூறப்படுகிறது.

தவெகவின் சமூக வலைதளப் பிரசாரம் என்பது அக்கட்சிக்கு ஆதரவாக இயங்கும் தனிநபர் கணக்குகள் மற்றும் ரசிகர் பக்கங்களுடன் முடிந்துவிடவில்லை என்றும், ஏரியா வாரியாக வாட்ஸ் அப் குழுக்கள் மற்றும் கம்யூனிட்டிகள் ஒருங்கிணைக்கப்பட்டதாகவும் சில அரசியல் விமர்சகர்கள் தெரிவிக்கின்றனர். இதுபோன்ற குழுக்கள் பொதுவான பெயர்களில் செயல்படுவதாகவும் கூறப்படுகிறது.

உதாரணமாக, ஒரு குறிப்பிட்ட பகுதியை மையமாக வைத்து ‘நம்ம செங்கல்பட்டு’, ‘நம்ம தாராபுரம்’ போன்ற பெயர்களில் சமூக வலைதளக் கணக்குகள் அல்லது குழுக்கள் தொடங்கப்படுவதாகக் கூறப்படுகிறது. ஆரம்பத்தில் அந்தப் பகுதியின் செய்திகள், உள்ளூர் நிகழ்வுகள், ஊர் சார்ந்த தகவல்கள் மற்றும் பொதுவான பதிவுகள் பகிரப்படுவதால், அந்தப் பகுதியைச் சேர்ந்தவர்கள் இயல்பாகவே அந்தக் குழுக்களில் இணையும் சூழல் உருவாகும்.

பின்னர், இதுபோன்ற குழுக்களில் அரசியல் கருத்துகள், தவெகவுக்கு ஆதரவான பதிவுகள் மற்றும் முந்தைய ஆட்சிக்கு எதிரான விமர்சனங்கள் உள்ளிட்டவை பகிரப்பட்டதாக அரசியல் வட்டாரங்களில் கூறப்படுகிறது. தேர்தல் நெருங்கும் நேரத்தில் ஏற்கனவே உருவாக்கப்பட்டிருந்த உள்ளூர் டிஜிட்டல் வலையமைப்பை கட்சியின் பிரசாரத்துக்கு பயன்படுத்தியதாகவும் சிலர் தெரிவிக்கின்றனர்.

குறிப்பாக 2025 நவம்பர் மாதத்துக்குப் பிறகு இதுபோன்ற சுமார் 34 ஆயிரம் வாட்ஸ் அப் கம்யூனிட்டிகள் ஒருங்கிணைக்கப்பட்டதாக கூறப்படும் தகவல் தற்போது பேசுபொருளாகியுள்ளது. ஒவ்வொரு குழுவிலும் நூற்றுக்கணக்கானோர் இடம்பெற்றிருந்தால், அதன் மூலம் மிகப்பெரிய எண்ணிக்கையிலான பயனர்களை சென்றடைய முடியும் என்பதே இந்த டிஜிட்டல் பிரசாரத்தின் நோக்கமாக இருப்பதாக அரசியல் விமர்சகர்கள் கூறுகின்றனர்.

எனினும், 34 ஆயிரம் குழுக்கள் என்ற எண்ணிக்கை குறித்த அதிகாரப்பூர்வ தரவுகள் அல்லது அவற்றின் உறுப்பினர் எண்ணிக்கை குறித்த முழுமையான தகவல்கள் பொதுவெளியில் வெளியாகவில்லை. எனவே, இந்த எண்ணிக்கையை அரசியல் வட்டாரங்களில் கூறப்படும் தகவலாகவே பார்க்க வேண்டியுள்ளது.

ஏரியா வாரியாக உருவாக்கப்படும் சமூக வலைதளக் குழுக்களில் முதலில் பொதுவான உள்ளூர் தகவல்கள் பகிரப்பட்டு, பின்னர் அவை அரசியல் பிரசாரத்திற்கான தளங்களாக பயன்படுத்தப்பட்டதாக கூறப்படுவது, தேர்தல் காலத்தில் டிஜிட்டல் ஊடகங்களின் முக்கியத்துவத்தை வெளிப்படுத்துவதாக அரசியல் பார்வையாளர்கள் தெரிவிக்கின்றனர்.

கடந்த காலங்களில் பாஜக உள்ளிட்ட சில அரசியல் கட்சிகள் சமூக வலைதளங்களை அரசியல் தொடர்பாடலுக்காக தீவிரமாக பயன்படுத்தியதாகவும், தற்போது அதேபோன்ற டிஜிட்டல் அணுகுமுறைகளை தவெகவும் கையாள்வதாகவும் சில அரசியல் விமர்சகர்கள் ஒப்பிடுகின்றனர்.

இதற்கிடையே, தவெகவின் டிஜிட்டல் வலிமையை எதிர்கொள்ள திமுக மற்றும் அதிமுக ஆகிய கட்சிகளும் தங்களது சமூக வலைதளப் பிரிவுகளை வலுப்படுத்தி வருவதாக கூறப்படுகிறது. குறிப்பாக இளைஞர்கள் மற்றும் முதல் தலைமுறை டிஜிட்டல் வாக்காளர்களை சென்றடைய சமூக வலைதளங்கள் முக்கியமான தளமாக இருப்பதை அரசியல் கட்சிகள் உணர்ந்துள்ளன.

திமுக கடந்த காலங்களில் தேர்தல் சூழலுக்கு ஏற்ப தனது பிரசார முறைகளை மாற்றிக்கொண்டிருப்பதை சுட்டிக்காட்டும் அரசியல் பார்வையாளர்கள், தற்போதும் டிஜிட்டல் தளங்களில் தனது இருப்பை அதிகரிக்கும் முயற்சிகளை மேற்கொண்டு வருவதாக தெரிவிக்கின்றனர். அதிமுகவும் தேர்தலுக்குப் பிறகு சமூக வலைதளங்களில் தனது செயல்பாடுகளை அதிகரிக்கத் தொடங்கியுள்ளதாக கூறப்படுகிறது.

இதனால் தமிழக அரசியலில் களப்பிரசாரத்துடன் சேர்ந்து டிஜிட்டல் பிரசாரமும் முக்கியமான போட்டிக்களமாக மாறி வருகிறது. குறிப்பாக மதுராந்தகம், தாராபுரம் உள்ளிட்ட இடைத்தேர்தல்களில் சமூக வலைதளங்கள் எந்த அளவுக்கு அரசியல் பிரசாரத்தை பாதிக்கின்றன என்பதும் கவனிக்கப்படும் அம்சமாக உள்ளது. தவெக் பயன்படுத்தியதாகக் கூறப்படும் டிஜிட்டல் வியூகத்தை எதிர்க்கட்சிகளும் கையில் எடுக்கத் தொடங்கியுள்ள நிலையில், இந்த புதிய பிரசாரப் போட்டி தேர்தல் களத்தில் எத்தகைய தாக்கத்தை ஏற்படுத்தும் என்பது அடுத்தகட்டத்தில் தெரியவரும்.