முகம், கைகள் போன்ற பகுதிகளின் அழகைப் பராமரிப்பதில் அதிக அக்கறை செலுத்தும் பலர், முழங்கை மற்றும் முழங்கால் பகுதிகளில் படிந்திருக்கும் கருமையை பெரும்பாலும் கவனிக்காமல் விடுகின்றனர். இதனால், குறுகிய கை அல்லது முழங்கால் தெரியக்கூடிய ஆடைகளை அணியும்போது பலருக்கு தன்னம்பிக்கை குறைவு ஏற்படுகிறது.இந்த கருமையைப் போக்க விலையுயர்ந்த ரசாயன கிரீம்களை பயன்படுத்த வேண்டிய அவசியமில்லை. வீட்டிலேயே எளிதாகக் கிடைக்கும் இரண்டு பொருட்களைக் கொண்டு, இயற்கையான முறையில் சருமத்தைப் பராமரிக்கலாம்.

தேவையான பொருட்கள்
ஒரு தேக்கரண்டி பேக்கிங் சோடா
சில துளிகள் எலுமிச்சைச் சாறு
பயன்படுத்தும் முறை

முதலில் ஒரு சிறிய கிண்ணத்தில் ஒரு தேக்கரண்டி பேக்கிங் சோடாவை எடுத்துக் கொள்ளவும். அதனுடன் சில துளிகள் எலுமிச்சைச் சாற்றை சேர்த்து, மென்மையான விழுதுபோல் நன்றாகக் கலக்கவும்.இந்த விழுதை முழங்கை அல்லது முழங்காலில் கருமை அதிகமாக உள்ள பகுதிகளில் தடவி, மெதுவாக வட்ட வடிவில் 5 முதல் 10 நிமிடங்கள் வரை மசாஜ் செய்ய வேண்டும்.அதன்பிறகு, 10 முதல் 15 நிமிடங்கள் வரை உலர விடவும். பின்னர் வெதுவெதுப்பான நீரில் கழுவினால், தொடர்ந்து பயன்படுத்தும்போது கருமை படிப்படியாகக் குறையத் தொடங்கும்.

இது எவ்வாறு செயல்படுகிறது?
எலுமிச்சையில் இயற்கையாக உள்ள சிட்ரிக் அமிலம், சருமத்தில் படிந்துள்ள கருமையை மெல்ல மெல்ல குறைத்து, இயற்கையான பொலிவை மீட்டெடுக்க உதவுகிறது.
அதேநேரத்தில், பேக்கிங் சோடா இயற்கையான ஸ்கிரப்பாக செயல்பட்டு, சருமத்தின் மேற்பரப்பில் தேங்கியுள்ள இறந்த செல்கள் மற்றும் அழுக்குகளை நீக்கி, புதிய செல்கள் வெளிப்பட உதவுகிறது.

எத்தனை முறை பயன்படுத்தலாம்?
வாரத்திற்கு 2 அல்லது 3 முறை இந்த முறையை தொடர்ந்து பின்பற்றி வந்தால், முழங்கை மற்றும் முழங்கால் பகுதிகளில் உள்ள கருமை படிப்படியாக மங்கத் தொடங்கும். இதனால் கை மற்றும் கால்களின் நிறம் சீராக மாறி, சருமம் மென்மையாகவும் பொலிவுடனும் காணப்படும்.

குறிப்பு: உணர்திறன் அதிகமான சருமம் கொண்டவர்கள் அல்லது எலுமிச்சைச் சாறு பயன்படுத்தும்போது எரிச்சல் ஏற்படுபவர்கள், முதலில் சிறிய பகுதியில் சோதனை செய்து பார்த்த பிறகு மட்டுமே இந்த முறையைப் பயன்படுத்துவது நல்லது.