பெண்களின் உடல் ஆரோக்கியத்தில் முக்கிய பங்காற்றும் ஹார்மோன் சமநிலையை இயற்கையாகச் சீராக்கும் வழிகளில் ஒன்றாக “சீட் சைக்கிளிங்” (Seed Cycling) தற்போது அதிக கவனம் பெறும் ஆரோக்கிய முறையாக உருவெடுத்துள்ளது. ஆளி, பூசணி, சூரியகாந்தி மற்றும் எள் போன்ற விதைகளை மாதவிடாய் சுழற்சிக்கேற்ப ஒழுங்காக உட்கொள்ளும் இந்த நடைமுறை, ஈஸ்ட்ரோஜன் மற்றும் புரோஜெஸ்டிரோன் ஹார்மோன்களின் இயல்பான சமநிலையை பராமரிக்க உதவுகிறது என ஊட்டச்சத்து நிபுணர்கள் தெரிவிக்கின்றனர்.

மாதவிடாய் தொடங்கிய முதல் 13–14 நாட்கள் (ஃபாலிகுலர் கட்டம்) காலத்தில், தினமும் ஒரு டீஸ்பூன் அளவில் புதியதாக அரைக்கப்பட்ட ஆளி விதை மற்றும் பூசணி விதைகளை எடுத்துக்கொள்ள பரிந்துரைக்கப்படுகிறது. இவ்விதைகள் ஃபைட்டோ-ஈஸ்ட்ரோஜன், நார்ச்சத்து, மெக்னீசியம் மற்றும் ஓமேகா-3 கொழுப்பு அமிலங்கள் நிறைந்தவை என்பதால், உடலின் ஈஸ்ட்ரோஜன் அளவை சீராக்குவதுடன், சக்தி மற்றும் செரிமானத்தை மேம்படுத்துகின்றன.

அடுத்து வரும் லுடியல் கட்டத்தில் (14வது நாளுக்குப் பிறகு அடுத்த மாதவிடாய் வரை), தினமும் ஒரு டீஸ்பூன் சூரியகாந்தி மற்றும் எள் விதைகளை சேர்த்துக்கொள்வது பயனுள்ளதாகும். இவை வைட்டமின் E, துத்தநாகம், செலினியம் மற்றும் ஆரோக்கியமான கொழுப்புகள் நிறைந்ததால், புரோஜெஸ்டிரோன் சுரப்பை ஊக்குவித்து கருப்பையின் உள்வாய்வு ஆரோக்கியத்தை வலுப்படுத்துகின்றன.

இந்த சீட் சைக்கிளிங் முறையின் மூலம் பல்வேறு நன்மைகள் கிடைக்கின்றன. ஒழுங்கற்ற மாதவிடாய் சுழற்சியை சீராக்குவதுடன், முன் மாதவிடாய் அறிகுறிகள் (PMS) எனப்படும் வயிற்று வலி, தசைப்பிடிப்பு, மார்பக வலி, உடல் வீக்கம் மற்றும் மனஅழுத்தம் போன்றவற்றையும் குறைக்க உதவுகிறது.

பூசணி மற்றும் எள் விதைகளில் உள்ள துத்தநாகம், ஆண்ட்ரோஜன் ஹார்மோன் அளவைக் கட்டுப்படுத்தி, ஹார்மோன் காரணமாக ஏற்படும் முகப்பருக்களை குறைக்கவும் துணைபுரிகிறது.மேலும், இவ்விதைகளில் உள்ள ஆன்டி-ஆக்ஸிடன்ட்கள் மற்றும் ஓமேகா-3 கொழுப்பு அமிலங்கள் உடலில் ஏற்படும் அழற்சியை குறைத்து, சருமம் பொலிவுடன் இருக்க உதவுகின்றன.

இனப்பெருக்க ஆரோக்கியத்திலும் இவை முக்கிய பங்கு வகிக்கின்றன. கருமுட்டை வளர்ச்சியை மேம்படுத்துவதுடன், கருப்பை பகுதிக்கு இரத்த ஓட்டத்தை அதிகரித்து, கருத்தரிப்புக்கு உகந்த சூழலை உருவாக்குகின்றன. செலினியம் மற்றும் வைட்டமின் E போன்ற சத்துக்கள், கருமுட்டைகளை ஆக்சிடேட்டிவ் அழுத்தத்திலிருந்து பாதுகாக்கும் பணியும் செய்கின்றன.இதனுடன், அதிக நார்ச்சத்து கொண்ட இவ்விதைகள் குடல் ஆரோக்கியத்தையும் மேம்படுத்துகின்றன.

மலச்சிக்கலைத் தடுப்பதோடு, உடலில் தேவையற்ற ஹார்மோன் கழிவுகளை வெளியேற்ற உதவுவதால், உடல் டிடாக்ஸ் செயல்முறை இயல்பாக நடைபெறுகிறது. தூக்கத்தின் தரம் உயர்வு, மனநிலை சீராக்கம் மற்றும் உடல் எடை கட்டுப்பாடு போன்ற கூடுதல் நன்மைகளும் இந்த முறையில் கிடைக்கின்றன.

எனினும், இந்த முறையைத் தொடங்குவதற்கு முன் தனிப்பட்ட உடல்நிலை, ஹார்மோன் பிரச்சனைகள் அல்லது கர்ப்பத்திற்கான திட்டங்கள் உள்ளவர்கள் மருத்துவர் அல்லது ஊட்டச்சத்து நிபுணரின் ஆலோசனையை பெறுவது அவசியம். சரியான முறையில் தொடர்ந்து பின்பற்றப்பட்டால், சீட் சைக்கிளிங் பெண்களின் முழுமையான ஹார்மோன் மற்றும் இனப்பெருக்க ஆரோக்கியத்தை மேம்படுத்தும் இயற்கை தீர்வாக அமையும் என நிபுணர்கள் தெரிவிக்கின்றனர்.