இந்தியாவில் எந்த ஒரு பால் கடைக்குச் சென்றாலும், அங்குள்ள பால் பாக்கெட்டுகள் நீலம், பச்சை, ஆரஞ்சு, ஊதா போன்ற பல வண்ணங்களில் ஒழுங்காக அடுக்கி வைக்கப்பட்டிருப்பதை காணலாம். இவ்வண்ணங்களே, அந்தப் பாக்கெட்டுக்குள் உள்ள பாலைப் பற்றிய முக்கிய தகவலை மௌனமாக வெளிப்படுத்துகின்றன.

பால் லேசானதா, மிதமானதா, அதிக அடர்த்தியுடையதா என்பதை இந்த நிறங்களே எளிதாக உணர்த்துகின்றன.காலப்போக்கில், இந்த வண்ண அடையாள முறை பொதுமக்களின் அன்றாட வாழ்க்கையில் பழக்கமாகி விட்டது.

உணவுப் பொருட்களின் லேபிள் மற்றும் பாதுகாப்பு விதிமுறைகளை இந்திய உணவுப் பாதுகாப்பு மற்றும் தரநிலைக் கழகம் ஒழுங்குபடுத்தினாலும், பால் பாக்கெட்டுகளில் பயன்படுத்தப்படும் இந்த நிறங்கள், அந்தந்த நிறுவனங்களால் பாலின் கொழுப்பு சதவீதம் மற்றும் வகையைச் சுட்டிக்காட்டும் விதமாக பயன்படுத்தப்படுகின்றன.
வண்ணங்களின் பொருள்:
நீலம் – டோன்டு பால்; சுமார் 3% கொழுப்பு
பச்சை – தரப்படுத்தப்பட்ட பால்; சுமார் 4.5% கொழுப்பு
ஆரஞ்சு – முழுக் கொழுப்பு பால்; சுமார் 6% கொழுப்பு
ஊதா – இருமுறை டோன்டு பால்; சுமார் 1.5% கொழுப்பு
இதன் மூலம், தினசரி தேநீர் தயாரிக்க குறைந்த கொழுப்பு பால் தேவைப்படுகிறதா அல்லது தயிர், இனிப்பு, சமையல் போன்றவற்றிற்கு அதிக கொழுப்பு பால் வேண்டுமா என்பதை ஒரு நொடியில் தீர்மானிக்க முடிகிறது.பால் நிறுவனங்கள் இந்த வண்ணங்களைத் தேர்வு செய்வதற்கான முக்கிய காரணம், வாங்கும் செயல்முறையை எளிதாக்குவதாகும்.

பால் என்பது அன்றாடம் சிந்திக்காமல் வாங்கப்படும் பொருளாக இருப்பதால், வேகமான தேர்வு அவசியமாகிறது. ஒரே நிறுவனத்தின் பல்வேறு பால் வகைகள் அருகருகே வைக்கப்பட்டிருக்கும் போது, இந்த நிறங்கள் குழப்பத்தைத் தவிர்த்து, சரியான தேர்வை எளிதாக செய்ய உதவுகின்றன.

பிராண்டுகள் மாறினாலும், வண்ண அடையாளம் மூலம் கொழுப்பு அளவு மற்றும் பயன்பாடு தெளிவாக பிரிக்கப்பட்டிருப்பது வாடிக்கையாளர்களுக்கு மிகுந்த உதவியாக உள்ளது. தவறான வகை பாலை வாங்கும் சிக்கலை தவிர்க்கவும் இது துணைபுரிகிறது. இதனால், பாக்கெட்டின் பெயரைவிட அதன் நிறமே மக்களின் நினைவில் நிலைத்துச் செல்கிறது.

பொதுவாக நிலவும் தவறான எண்ணம் என்னவென்றால், அதிக பிரகாசமான அல்லது அடர்த்தியான நிறத்தில் இருக்கும் பால் பாக்கெட் தான் சிறந்தது என்பதாகும். ஆனால் உண்மையில், இந்த வண்ணக் குறியீடு தரத்தை அளவிடுவதற்கல்ல; பாலின் வகையும் அதில் உள்ள கொழுப்பு சதவீதத்தையும் மட்டும் சுட்டிக்காட்டுவதற்கே பயன்படுத்தப்படுகிறது என தெரிவிக்கப்படுகின்றது.