'வெனிசுலா வான்வெளி மூடப்பட்டுள்ளது. விமானங்கள் பறக்க தடை': அமெரிக்க அதிபர் அறிவிப்பு..!

அமெரிக்காவில் போதை பொருள் புழக்கம் அதிகளவில் இருப்பதற்கு வெனிசுலா தான் காரணம் என அந்நாட்டு அதிபர் டொனால்ட் டிரம்பின் குற்றச்சாட்டி வருகிறார். ஆனால், ட்ரம்பின் இந்த குற்றச்சாட்டை வெனிசுலா மறுத்து வருகிறது. இருப்பினும் கரீபியன் கடல்பகுதியில் போர்க்கப்பல்கள், போர் விமானங்களை அமெரிக்கா குவித்து வருகிறது.

அத்துடன், வெனிசுலாவுக்கு எதிராக ராணுவ நடவடிக்கைகள் எடுப்பது குறித்து டிரம்பிடம் ராணுவ அதிகாரிகள் ஆலோசனை நடத்தியுள்ளனர். இந்நிலையில், 'வெனிசுலா நாட்டு வான்வெளி மற்றும் அதை சுற்றியுள்ள வான்வெளி மூடப்படுவதாகவும், அங்கே எந்த விமானமும் பறக்கக் கூடாது என டிரம்ப் அறிவித்துள்ளார்.

இதுகுறித்து அவர் தனது எக்ஸ் வலைதள பதிவில் குறிப்பிட்டுள்ளதாவது; ''விமான நிறுவனங்கள், விமானிகள், போதை கடத்தல்காரர்கள் அனைவரும் வெனிசுலாவிற்கு மேலே உள்ள வான்வெளி மற்றும் அதைச் சுற்றியுள்ள வான்வெளி முழுவதுமாக மூடப்பட்டிருப்பதைக் கருத்தில் கொள்ளவும்.'' என்று டிரம்ப் குறிப்பிட்டுள்ளார்.

ஆனால், டிரம்பின் இந்த புதிய அறிவிப்பு குறித்து வெனிசுலா தரப்பில் இருந்து எவ்வித எதிர் கருத்துகளும் வெளியாகவில்லை என்பதும் குறிப்பிடத்தக்கது.