இந்தியர்கள் அவர்களது வீடுகளில் அவர்களது சொந்த தாய்மொழியில் பேச வேண்டும் என ஆர்எஸ்எஸ் தலைவர் மோகன் பகவத் வேண்டுகோள் விடுத்துள்ளார். மஹாராஷ்டிரா மாநிலம் நாக்பூரில் நடந்த நிகழ்ச்சியில் கலந்து கொண்டு பேசும் போதே அவர் இவ்வாறு குறிப்பிட்டுள்ளார். தொடர்ந்து அவர் அங்கு பேசுகையில் குறிப்பிட்டுள்ளதாவது:

ஒரு காலத்தில் சமஸ்கிருதமே முதன்மை தொடர்பு மொழியாக இருந்தது என்றும், ஆனால், இன்று ஒரு அமெரிக்கப் பேராசிரியர் நமக்கு சமஸ்கிருதம் கற்பித்து கொடுக்கிறார் என்று சுட்டிக்காட்டியுள்ளார். உண்மையில் நாம் தான் உலகிற்கு சமஸ்கிருதத்தை கற்றுக்கொடுக்க வேண்டும். ஆனால், நம் நாட்டில் பல குழந்தைகளுக்கு அடிப்படை சொற்கள்கூட தெரியாது என்று தெரிவித்துள்ளார்.

இதற்கு காரணம், நம் வீடுகளில் மொழியையும், ஆங்கிலத்தையும் கலந்து பேசுவது தான் என்று மோகன் பகவத் தெரிவித்துள்ளார். மேலும், சில இந்தியர்களுக்கு இந்திய மொழிகளே சரியாகத் தெரியாது என்று குறிப்பிட்டுள்ள அவர், இதை மாற்ற வேண்டுமெனில், நம் வீடுகளில் தாய்மொழியில் பேச வேண்டும் என்று கோரிக்கை வைத்துள்ளார்.

ஆனாலும், அதனை நாம் செய்ய மாட்டோம் என்று சுட்டிக்காட்டியதோடு, இன்றைய காலத்தில் துறவிகள் மற்றும் முனிவர்கள் கூட ஆங்கிலத்தில் தான் பேசுகிறார்கள் என்று ஆர்.எஸ்.எஸ் தலைவர் மோகன் பகவத் கூறியுள்ளார்.