தமிழ் சினிமாவின் முன்னணி இயக்குநராக உயர்ந்து நிற்பவர் லோகேஷ் கனகராஜ். ‘கைதி’, ‘விக்ரம்’ போன்ற படங்களால் ரசிகர்களை கவர்ந்த அவர், ரஜினிகாந்துடன் இணைந்த ‘கூலி’ படம் எதிர்பார்த்த வரவேற்பை பெறாததால், அவரது அடுத்த முயற்சி என்ன என ரசிகர்கள் ஆவலுடன் காத்திருக்கிறார்கள். பலரும் ‘கைதி 2’ தான் அடுத்த படம் என்று நம்பியிருந்த நிலையில், தற்போது அந்த திட்டம் தடுமாறி இருப்பதாக தகவல்கள் வெளியாகி, கோலிவுட்டில் பரபரப்பை ஏற்படுத்தியுள்ளது.

லோகேஷ் சில பேட்டிகளில் ‘கைதி 2’ தான் அடுத்த படம் எனக் குறிப்பிட்டிருந்தார். எனினும் அதிகாரப்பூர்வ அறிவிப்போ, படப்பிடிப்பு தொடங்கியதாகவோ எந்த தகவலும் வெளியாகவில்லை. இந்நிலையில் முக்கியமான தகவல் ஒன்று வெளியாகி ‘டாக் ஆஃப் த டவுன்’ ஆகியுள்ளது.

தகவலின் படி, பெரிய ஸ்டார் ஒருவர் கிடைத்தால் ‘கைதி 2’-ஐ உடனே ஒத்திவைக்கலாம் என லோகேஷ் நினைத்து வருவதாக கூறப்படுகிறது. இதனால், நீண்ட நாளாக காத்திருந்த கார்த்தி அதிருப்தியடைந்துள்ளதாகவும், தற்போது ‘கைதி 2’ மீது அவர் ஆர்வம் குறைந்து விட்டதாகவும் கூறப்படுகிறது. இந்த பிரச்சனை காரணமாக திட்டமே தாமதமாகி இருப்பதாகப் பேசப்படுகிறது.

இதற்கிடையில், லோகேஷ் கனகராஜ் அஜித்துக்கு ஒரு புதிய கதையை சொல்லியதாகவும், அந்த கதை அஜித்துக்கு பிடித்து விட்டதால், AK64 மற்றும் கார் ரேஸ் கமிட்மெண்ட் முடிந்ததும் படத்தைத் தொடங்கலாம் என பேச்சு நடக்கிறது என்ற தகவலும் பரவுகிறது.

அதேபோல, அல்லு அர்ஜுனுக்கும் லோகேஷ் கதை கூறியுள்ளார். அட்லி படத்துக்குப் பிறகும், புஷ்பா 3 சூழலைப் பார்த்து தான் தேதிகள் முடியும் என அல்லு அர்ஜுன் தெரிவித்ததாகவும் செய்திகள் வெளியாகியுள்ளது.

இதனால், லோகேஷ் கனகராஜின் அடுத்த படம் ‘கைதி 2’ அல்லாமல், அஜித் அல்லது அல்லு அர்ஜுனுடன் இணையும் பெரிய ஸ்டார் படமாக மாற வாய்ப்பு அதிகமாகி உள்ளது. இது கார்த்தி–லோகேஷ் கூட்டணியின் எதிர்காலத்தையும் கேள்விக்குறியாக்கியுள்ளது.

கைதி 2 நடக்குமா? இல்லை லோகேஷ் கனகராஜ் பெரிய ஸ்டார் பக்கம் முழுமையாக திரும்பிவிட்டாரா? — அதிகாரப்பூர்வ அறிவிப்பு வரை கோலிவுட் காத்திருக்க வேண்டிய சூழல் உருவாகியுள்ளது.