2026 சட்டமன்றத் தேர்தலை முன்வைத்து திமுக முக்கியமான தொகுதி பங்கீட்டு திட்டத்தை வடிவமைத்து வருவதாக தகவல்கள் வெளியாகியுள்ளன. 2021 தேர்தலில் அதிமுக 66 தொகுதிகளில் வென்றது. இந்த எண்ணிக்கையை அடுத்த தேர்தலில் 30-க்குள் குறைப்பதே திமுக தலைமை வகுக்கும் முக்கிய வியூகமாக கூறப்படுகிறது.

கடந்த முறை கூட்டணி கட்சிகள் போட்டியிட்ட பல தொகுதிகளில் அதிமுக வெற்றி பெற்றது. உதாரணமாக,

இந்திய கம்யூனிஸ்ட் போட்டியிட்ட 6 தொகுதிகளில் 2 மட்டுமே வெற்றி

மார்க்சிஸ்ட் கம்யூனிஸ்ட் 2 தொகுதிகள் – இரண்டிலும் வெற்றி

விசிக போட்டியிட்ட 6 தொகுதிகளில் 4 மட்டும் வெற்றி

காங்கிரஸ் போட்டியிட்ட 6 தொகுதிகளிலும் தோல்வி

இத்தகைய சூழலில், 2021-ல் கூட்டணி கட்சிகள் தோல்வியடைந்த பகுதிகளில் இந்த முறை திமுக நேரடியாக களம் இறங்க முடிவு செய்துள்ளதாக தெரிவிக்கப்படுகிறது.

அதேநேரம், வெற்றி வாய்ப்பு அதிகமுள்ள தொகுதிகளில் மட்டுமே கூட்டணி கட்சிகளை நிறுத்தவும் திட்டமிடப்பட்டுள்ளது. இதில் காங்கிரஸுக்கு அதிகபட்சம் 25 தொகுதிகள், மற்ற கூட்டணிக்கட்சிகளுக்கு மொத்தம் 40 தொகுதிகள், விசிகவுக்கு கடந்த முறை விட 2 தொகுதிகள் கூடுதலாக வழங்கும் திட்டமும் ஆராயப்படுகின்றது.

மதிமுக மற்றும் சில சிற்றுக் கட்சிகளுக்கு 2021 போலவே உதயசூரியன் சின்னத்தில் போட்டியிட திமுக தலைமையே முடிவு செய்துவிட்டதாக அறிவாலய வட்டாரங்கள் தெரிவிக்கின்றன.

2026 தேர்தலுக்கான கூட்டணி அமைப்பு, திமுக தரப்பில் மிக நுணுக்கமாக கணக்கிட்டு வகுக்கப்படும் எனவும், அதிமுக வாக்கு வங்கி குறைய தந்திர ரீதியான மாற்றங்கள் செய்யப்படுவதாகவும் அரசியல் வட்டாரங்கள் மதிப்பிடுகின்றன.