பிரதமர் நரேந்திர மோடி, எதிர்கால விண்வெளிப் பயணங்களுக்காக 40 முதல் 50 விண்வெளி வீரர்களைக் கொண்ட ஒரு பெரிய குழுவை உருவாக்க இந்தியா முனைந்து செயல்பட வேண்டும் என்று தெரிவித்துள்ளார்.

சமீபத்தில் 20 நாட்கள் விண்வெளியில் பயணம் செய்து திரும்பிய முதல் இந்தியர் சுபான்ஷு சுக்லாவை சந்தித்தபோது, பிரதமர் மோடி இந்தக் கருத்தை வெளியிட்டார். இந்த சந்திப்பின் வீடியோ நேற்று வெளியானது.

அமெரிக்க தனியார் விண்வெளி நிறுவனம் ஆக்ஸியம் ஸ்பேஸ் மேற்கொண்ட ஆக்ஸியம்-4 (Axiom-4) விண்வெளி பயணத்தின் மூலம் சர்வதேச விண்வெளி நிலையத்துக்கு (ISS) சென்ற முதல் இந்தியர் என்ற பெருமையை சுபான்ஷு சுக்லா பெற்றார்.

சந்திப்பின்போது, விண்வெளி அனுபவங்களை பிரதமரிடம் பகிர்ந்த சுக்லா, ஈர்ப்பு விசை இல்லாத நிலையில் உடல் சரிசெய்தல், விண்வெளி ஆய்வகத்தில் சோதனைகள் நடத்தல் உள்ளிட்ட பல சுவாரஸ்ய அனுபவங்களை விவரித்தார்.

இதையடுத்து, இந்தியாவுக்கு எதிர்காலத்தில் ககன்யான் திட்டம் மற்றும் பாரதிய அந்தரிக்ஷா நிலையம் (இந்திய விண்வெளி நிலையம்) போன்ற முக்கியமான திட்டங்கள் உள்ளன எனவும், இந்தியா விண்வெளி ஆராய்ச்சியில் முன்னணியில் இருக்கப் போவதாகவும் பிரதமர் மோடி நம்பிக்கை தெரிவித்தார்.

இதற்குப் பதிலளித்த சுபான்ஷு சுக்லா, “இந்தியாவின் ககன்யான் திட்டம் உலக நாடுகளின் கவனத்தை ஈர்த்துள்ளது. சந்திரயான்-2 தோல்விக்குப் பிறகும் அரசு அளித்த உறுதியான ஆதரவு தான் சந்திரயான்-3 வெற்றிக்கு காரணம்” என்று கூறினார்.

மேலும், இந்தியாவின் தலைமையில் சர்வதேச பங்கேற்புடன் உருவாகும் விண்வெளி நிலையம், உலக விண்வெளித் துறையில் இந்தியா ஒரு தலைமைப் பாத்திரத்தை வகிக்க வழிவகுக்கும் எனவும் சுக்லா தெரிவித்தார்.