தெற்கு மும்பையைச் சேர்ந்த அப்துல்லா டோகாடியா (40), அவரது மனைவி நஸ்ரின் (35) மற்றும் அவர்களது மகள்கள் ஆயிஷா (16), ஜைனப் (13) ஆகியோர் கடந்த சனிக்கிழமை இரவு ஒரு குடும்ப விழாவில் பங்கேற்றனர். அங்கிருந்து வீடு திரும்பிய பின் அவர்கள் தர்பூசணி பழத்தை உட்கொண்டுள்ளனர்.

சிறிது நேரத்திலேயே நான்கு பேருக்கும் தீவிர வாந்தி மற்றும் வயிற்றுப்போக்கு ஏற்பட்டுள்ளது. துரதிர்ஷ்டவசமாக, மருத்துவமனைக்கு அழைத்துச் செல்லப்பட்ட சில மணி நேரங்களிலேயே அவர்கள் அனைவரும் சிகிச்சை பலனின்றி உயிரிழந்தனர். அவர்களின் பிரேதப் பரிசோதனை முடிவுகள், உணவு நச்சுத்தன்மையே மரணத்திற்கு முக்கிய காரணமாக இருக்கலாம் என்று தெரிவிக்கின்றன.

இந்தச் சோகச் சம்பவம் தர்பூசணி சந்தையில் ஒரு பெரும் நிலநடுக்கத்தை ஏற்படுத்தியுள்ளது. கோடை காலத்தில் அதிக தேவையுள்ள தர்பூசணிக்கு, தற்போது ஆசியாவின் மிகப்பெரிய சந்தையான நவி மும்பை ஏபிஎம்சி-யில் (APMC) மவுசு திடீரெனக் குறைந்துள்ளது. ஒரே குடும்பத்தைச் சேர்ந்த நான்கு பேர் பலியான செய்தி பரவியதால், பொது மக்கள் அச்சம் காரணமாகத் தர்பூசணி வாங்குவதை முற்றிலுமாகத் தவிர்த்து வருகின்றனர்.

இதனால் சந்தை விலையில் வரலாறு காணாத சரிவு ஏற்பட்டுள்ளது. ஒரு கிலோ தர்பூசணி தற்போது வெறும் ரூ. 5 முதல் ரூ. 7 வரை மட்டுமே விற்கப்படுகிறது. பொதுவாக மொத்த விற்பனையில் ரூ. 10 முதல் ரூ. 35 வரையும், சில்லறையில் ரூ. 30 முதல் ரூ. 100 வரையும் விற்கப்பட வேண்டிய பழம், தற்போது அடிமாட்டு விலைக்குச் செல்வதால் விவசாயிகள் மற்றும் வியாபாரிகள் பெரும் பொருளாதார நஷ்டத்தைச் சந்தித்து வருகின்றனர். ஒரு குடும்பத்தின் இழப்பு ஒட்டுமொத்த தர்பூசணி விவசாய சந்தையில் இவ்வளவு பெரிய தாக்கத்தை ஏற்படுத்தியுள்ளது.