இந்திய விண்வெளி ஆராய்ச்சி நிறுவனம் (இஸ்ரோ) ஜி.எஸ்.எல்.வி. மாா்க்-3 ராக்கெட் மூலம் 36 செயற்கைகோள்கள் இம்மாதம் 3-வது அல்லது 4-வது வாரத்தில் விண்ணில் ஏவ திட்டமிட்டுள்ளதாக விஞ்ஞானிகள் தெரிவித்துள்ளனர். 

ஆந்திர மாநிலம் ஸ்ரீஹரிகோட்டாவில் உள்ள சதீஷ் தவான் விண்வெளி ஆய்வு மையத்தில் உள்ள 2-வது ஏவுதளத்தில் இருந்து ஏவப்பட உள்ளது. இந்த ராக்கெட் 640 டன் எடை கொண்டது. மேலும் ஜி.எஸ்.எல்.வி. மார்க்-3 திட, திரவ மற்றும் கிரையோஜெனிக் எந்திரங்களால் இயக்கப்படும் 3-நிலைகளை கொண்ட ராக்கெட்டாகும்.

இதில் முதல் நிலை திட எரிபொருள், 2-வது திரவ எரிபொருள் மற்றும் 3-வது நிலையில் கிரையோஜெனிக் எந்திரம் பொறுத்தப்பட்டு உள்ளது. 36 செயற்கைகோள்கள் வெற்றிகரமாக பல்வேறு கட்ட சோதனைக்கு உட்படுத்தப்பட்டு உள்ளன மற்றும் விநியோக அலகுடன் ஒருங்கிணைக்கப்பட்டுள்ளன.

மேலும் கிரையோஜெனிக் என்ஜின் உள்ள 3-வது கட்டத்தில் 36 செயற்கைகோள்களுடன் வெப்பக் கவசம் பொறுத்தப்படும். இந்த 36 செயற்கைகோள்களும் சுமார் 6 டன் எடையை கொண்டவையாகும். 

இது இந்தியா பார்தி குளோபல் மற்றும் இங்கிலாந்து நாட்டு அரசின் கூட்டு முயற்சியாகும். இதையடுத்து 36 செயற்கைகோள்களின் மற்றொரு தொகுப்பு 2023-ம் ஆண்டு ஜனவரி மாதம் புவி சுற்றுப்பாதையில் வைக்க திட்டமிடப்பட்டுள்ளது.

மேலும் இந்தவகை செயற்கைகோள்கள் நிறுவனங்களின் தகவல் தொடர்பு சேவைகளை வழங்குவதற்காக குறைந்த புவி சுற்றுப்பாதையில் 650 செயற்கைகோள்களின் தொகுப்பை உருவாக்கவும் திட்டமிட்டுள்ளதாக விஞ்ஞானிகள் தெரிவித்துள்ளனர்.