ஆண்டுதோறும் மிகுந்த ஆவலுடன் எதிர்பார்க்கப்படும் பாராளுமன்ற பட்ஜெட் கூட்டத்தொடர், கடந்த ஜனவரி 28-ஆம் தேதி குடியரசுத் தலைவர் திரவுபதி முர்மு அவர்களின் உரையாற்றலுடன் கோலாகலமாகத் தொடங்கியது.

இந்த ஆண்டின் கன்னித் தொடர் என்பதால், பாராளுமன்றத்தின் இரு அவைகளின் கூட்டுக் கூட்டத்தில் குடியரசுத் தலைவர் உரையாற்றி வழிநடத்தினார்.

நேற்று (பிப். 1) 2026-27 நிதியாண்டுக்கான மத்திய பட்ஜெட் தாக்கல் செய்யப்பட்டு நாடு முழுவதும் விவாதப் பொருளாகியுள்ள நிலையில், அதன் தொடர்ச்சியாகக் குடியரசுத் தலைவர் உரைக்கு நன்றி தெரிவிக்கும் தீர்மானத்தின் மீதான விவாதம் இன்று (பிப். 2) மக்களவையில் அரங்கேறுகிறது.

நாடாளுமன்ற ஜனநாயகத்தின் மிக முக்கிய நிகழ்வுகளில் ஒன்றாக இது கருதப்படுகிறது.இந்த வரலாற்றுச் சிறப்புமிக்க விவாதத்தைப் பாரதிய ஜனதா கட்சியின் சார்பில் மத்திய அமைச்சர் சர்பானந்த சோனோவால் தொடங்கி வைக்கிறார்.

அவரைத் தொடர்ந்து, இளம் நாடாளுமன்ற உறுப்பினர் தேஜஸ்வி சூர்யா இந்த நன்றி தீர்மானத்தை வழிமொழிந்து உரையாற்றவுள்ளார்.மக்களவைச் செயலகம் வெளியிட்டுள்ள தகவலின்படி, ஆளுங்கட்சி மற்றும் எதிர்க்கட்சி உறுப்பினர்களின் ஆக்கப்பூர்வமான வாதங்களுக்காக ஒட்டுமொத்தமாக 18 மணி நேரம் ஒதுக்கப்பட்டுள்ளது.

அனைத்துத் தரப்பு கருத்துகளும் முன்வைக்கப்பட்ட பிறகு, இந்த விவாதங்களுக்குப் பிரதமர் நரேந்திர மோடி அவர்கள் வரும் பிப்ரவரி 4-ஆம் தேதி விளக்கமான பதிலுரையை வழங்குவார் என எதிர்பார்க்கப்படுகிறது.