மஞ்சள் காய்ச்சல் என்பது வைரஸ் தொற்றால் ஏற்படும் தீவிரமான நோயாகும். குறிப்பாக ஆப்பிரிக்கா, தென் அமெரிக்கா மற்றும் கரீபியன் பகுதிகளில் உள்ள சில நாடுகளில் இந்த நோய் காணப்படுகிறது. பாதிக்கப்பட்ட கொசுக்கள் மனிதர்களைக் கடிப்பதன் மூலம் வைரஸ் பரவுகிறது.மஞ்சள் காய்ச்சலை பரப்பும் கொசுக்கள் பெரும்பாலும் பகல் நேரங்களில் மனிதர்களைக் கடிக்கின்றன.

இவை நகர்ப்புறங்கள் மட்டுமின்றி கிராமப்புறங்களிலும் காணப்படுகின்றன. பாதிக்கப்பட்ட ஒருவரைத் தொடுவதாலோ, அவருடன் நெருக்கமாக இருப்பதாலோ இந்த நோய் மற்றொருவருக்கு நேரடியாகப் பரவாது.வைரஸ் உடலுக்குள் சென்ற பிறகு பொதுவாக 3 முதல் 6 நாட்களுக்குள் அறிகுறிகள் வெளிப்படத் தொடங்குகின்றன.

மஞ்சள் காய்ச்சலின் ஆரம்ப அறிகுறிகளாக திடீர் காய்ச்சல், கடுமையான தலைவலி, குமட்டல், வாந்தி, தசைவலி, முதுகுவலி மற்றும் பசியின்மை ஆகியவை ஏற்படலாம்.பொதுவாக இந்த அறிகுறிகள் சில நாட்களில் படிப்படியாகக் குறையத் தொடங்கும். பெரும்பாலானவர்கள் இந்த நிலையில் இருந்து முழுமையாக குணமடைகின்றனர்.

பாதிக்கப்பட்டவர்களில் ஒரு சிறு பகுதியினருக்கு நோய் மீண்டும் தீவிரமடைய வாய்ப்புள்ளது. இந்த நிலையில் மஞ்சள் காமாலை, சிறுநீரகப் பாதிப்பு மற்றும் வாய், மூக்கு, கண்கள் அல்லது வயிற்றுப் பகுதியில் ரத்தப்போக்கு போன்ற ஆபத்தான அறிகுறிகள் ஏற்படலாம்.நோய் மிகவும் தீவிரமான நிலையை அடையும் நோயாளிகளில் உயிரிழப்பு ஏற்படும் அபாயமும் உள்ளது.

எனவே அறிகுறிகளை அலட்சியப்படுத்தாமல் உடனடியாக மருத்துவ ஆலோசனை பெறுவது அவசியம்.மஞ்சள் காய்ச்சல் பரவும் பகுதிகளுக்குப் பயணம் செய்தவர்கள், அங்கிருந்து திரும்பிய பின்னர் காய்ச்சல் உள்ளிட்ட அறிகுறிகளை எதிர்கொண்டால் தாமதிக்காமல் மருத்துவரை அணுக வேண்டும்.

ரத்தப் பரிசோதனைகள் உள்ளிட்ட மருத்துவப் பரிசோதனைகள் மூலம் நோய்த்தொற்று இருப்பது உறுதி செய்யப்படுகிறது. மஞ்சள் காய்ச்சலை நேரடியாக குணப்படுத்தும் குறிப்பிட்ட மருந்து தற்போது இல்லை.

இருப்பினும், மருத்துவமனையில் தொடர் கண்காணிப்பு, தேவையான திரவங்கள் மற்றும் அறிகுறிகளுக்கு ஏற்ப வழங்கப்படும் சிகிச்சை மூலம் நோயாளியின் நிலையை கட்டுக்குள் கொண்டு வர முடியும்.மஞ்சள் காய்ச்சல் பரவும் பகுதிகளுக்குப் பயணம் செய்வதற்கு முன்பாக தடுப்பூசி செலுத்திக்கொள்வது நோயைத் தடுப்பதில் முக்கிய பங்கு வகிக்கிறது.

தடுப்பூசி செலுத்தப்பட்டதற்கான சர்வதேச தடுப்பூசி சான்றிதழ் வழங்கப்படுகிறது. இந்தச் சான்றிதழ் சில நாடுகளுக்குள் பயணம் செய்வதற்கு முக்கியமான ஆவணமாக இருக்கலாம்.

எனவே, வெளிநாட்டுப் பயணத்தைத் திட்டமிடுபவர்கள் செல்லும் நாட்டில் மஞ்சள் காய்ச்சல் தொடர்பான தடுப்பூசி விதிமுறைகள் உள்ளனவா என்பதை முன்கூட்டியே தெரிந்து கொண்டு, தேவையான தடுப்பூசி மற்றும் சான்றிதழை பெற்றுச் செல்வது பாதுகாப்பானது.