தமிழ் சினிமாவின் இரண்டு புரவலர்கள் — சூப்பர் ஸ்டார் ரஜினிகாந்த் மற்றும் உலக நாயகன் கமல்ஹாசன் — இணைந்து நடிக்க உள்ள படம் குறித்து கடந்த சில வாரங்களாக பரபரப்பு நிலவி வருகிறது. சுமார் 46 ஆண்டுகளுக்கு பிறகு இந்த சூப்பர் காம்போ மீண்டும் ஒன்றாக திரையில் களமிறங்கப்போவதாக ரசிகர்கள் உற்சாகத்துடன் எதிர்நோக்கி வருகின்றனர்.

சமீபத்தில் சைமா விருது விழாவில் பேசிய கமல்ஹாசன்,“எங்கள் காம்போவை ரசிகர்கள் விரும்பினால் அது எங்களுக்கு மகிழ்ச்சி. பல ஆண்டுகளாக இணைந்து நடிக்க முயற்சி செய்து வருகிறோம். விரைவில் ஒன்றாக வருவோம். அது உங்களை ஆச்சரியப்படுத்தும்,”
என்று கூறியிருந்தார். இதன் மூலம் இந்த ரஜினி–கமல் காம்போ படம் உறுதி செய்யப்பட்டதாகவே ரசிகர்கள் நம்பினர்.

ஆனால் இப்போது அதிர்ச்சி அப்டேட் ஒன்று வெளியாகியுள்ளது. ஆரம்பத்தில் இந்தப் படத்தை இயக்குநர் லோகேஷ் கனகராஜ் இயக்கவுள்ளதாக பேசப்பட்டாலும், தற்போது அவர் இந்தப் ப்ராஜெக்டில் இருந்து விலகியுள்ளார் என கோலிவுட்டில் செய்திகள் உறுதியாக பரவி வருகின்றன.

லோகேஷ், ரஜினிகாந்துக்கு ஒரு மாஸ் ஆக்ஷன் கதை கூறியிருக்கிறார். ஆனால் அந்தக் கதையில் அதிக அளவு வன்முறை இருந்ததாகவும், அது ரஜினிக்கு பிடிக்கவில்லை என்றும் கூறப்படுகிறது. இதனால் ரஜினி, லோகேஷ் கதைக்கு ஒப்புதல் அளிக்காமல் ப்ராஜெக்டை நிறுத்தி வைத்தார் என தகவல்கள் தெரிவிக்கின்றன.

இதற்கிடையில், இப்போது புதிய பெயர் ஒன்று முன்னுக்கு வந்துள்ளது —அதுவே நெல்சன் திலீப்குமார்!

நெல்சன் சமீபத்தில் ரஜினிக்கு புதிய கதையொன்றை கூறியிருக்கிறார். அந்தக் கதை ரஜினிகாந்துக்கு மிகவும் பிடித்ததாக கூறப்படுகிறது. அதனால் அவர் உடனடியாக கிரீன் சிக்னல் கொடுத்துள்ளார். இதனாலே தற்போது ரஜினி – கமல் இணைப்பு படத்தை நெல்சன் திலீப்குமார் இயக்கவுள்ளார் என்ற செய்தி கோலிவுட் வட்டாரங்களில் பரவி வருகிறது.

நெல்சன் ஏற்கனவே ‘ஜெயிலர்’ படத்தின் மூலம் ரஜினிகாந்துடன் இணைந்து மிகப்பெரும் வெற்றியை பதிவு செய்தவர். அந்தப் படம் ரஜினியின் கேரியரில் அதிக வசூல் செய்த திரைப்படமாக மாறியது. தற்போது அதன் தொடர்ச்சியான ‘ஜெயிலர் 2’ தயாராகி வருகிறது. படப்பிடிப்பு தற்போது வேகமாக நடைபெற்று வருகிறது.

ரஜினி, நெல்சனின் தொழில்முறை திறமைக்கும், அவர் கையாளும் எளிமையான ஹியூமர் மாஸ் ஸ்டைலுக்கும் பெரும் ரசிகராக இருப்பதால், மீண்டும் அவருடன் இணைவதில் ஆர்வம் காட்டியுள்ளார் என கூறப்படுகிறது.

மறுபுறம், கமல்ஹாசன் தற்போது சற்று சிக்கலில் இருக்கிறார். சமீபத்தில் அவர் நடித்த ‘தக் லைஃப்’ மற்றும் அதற்கு முன் ‘இந்தியன் 2’ ஆகிய படங்கள் எதிர்பார்த்த வெற்றியைப் பெறவில்லை. இதனால் புதிய படங்களைத் தேர்வு செய்யும் போது அவர் மிகுந்த கவனத்துடன் இருக்கிறார். தற்போது அன்பறிவு இயக்கத்தில் ஒரு ஆக்ஷன் படத்தில் நடித்து வருகிறார்.

 இதனால், ரஜினி–கமல் இணைப்பு படம் இனி நெல்சன் திலீப்குமார் இயக்கத்தில் உருவாகும் வாய்ப்பு மிக அதிகம் என கூறப்படுகிறது. இது உறுதியாகும் பட்சத்தில், தமிழ் சினிமாவில் இது அடுத்த பிக் ஸ்கேல் பிளாக்பஸ்டர் காம்போ ஆக மாறும் என்பதில் எந்த ஐயமும் இல்லை!