இயக்குநர் லோகேஷ் கனகராஜ் – கார்த்தி கூட்டணியில் உருவாகும் ‘கைதி 2’ திரைப்படம் குறித்து தென்னிந்திய ரசிகர்கள் நீண்ட நாட்களாக ஆவலுடன் காத்திருக்கின்றனர். லோகேஷ் கனகராஜ் இயக்குநராக அடையாளம் பெற்றதோடு, ‘லோகேஷ் சினிமாட்டிக் யுனிவர்ஸ்’ (LCU) என்ற பிரம்மாண்ட உலகம் உருவாகக் காரணமாக அமைந்த படம் ‘கைதி’ என்பதால், அதன் இரண்டாம் பாகத்துக்கு எதிர்பார்ப்பு மிக அதிகமாக இருந்தது.

ரஜினிகாந்தை வைத்து லோகேஷ் இயக்கிய ‘கூலி’ படத்திற்குப் பிறகு, ‘கைதி 2’ படப்பிடிப்பு தொடங்கும் என பலமுறை தகவல்கள் வெளியானது. ஆனால், சமீபத்தில் லோகேஷ் கனகராஜ், தெலுங்கு சூப்பர் ஸ்டார் அல்லு அர்ஜுனை நாயகனாக வைத்து புதிய படத்தை இயக்க உள்ளதாக அதிகாரப்பூர்வ அறிவிப்பு வெளியானதைத் தொடர்ந்து, ‘கைதி 2’ திட்டம் கைவிடப்பட்டதா என்ற சந்தேகம் ரசிகர்கள் மத்தியில் தீவிரமாக பேசப்படத் தொடங்கியுள்ளது.

இந்த விவாதத்தை மேலும் சூடுபிடிக்க வைத்தது நடிகர் கார்த்தியின் சமீபத்திய பதில். தனது புதிய படம் ‘வா வாத்தியார்’ வெளியீட்டை முன்னிட்டு திரையரங்கிற்கு வந்த கார்த்தியிடம், ‘கைதி 2 கைவிடப்பட்டதா?’ என்று கேள்வி எழுப்பப்பட்டபோது, “அதற்கு லோகேஷ்தான் பதில் சொல்ல வேண்டும்” என்று அவர் கூறினார். இந்த பதில் ரசிகர்கள் மத்தியில் பல்வேறு விதமான யூகங்களுக்கு வழிவகுத்துள்ளது.

இதற்கிடையில், லோகேஷ் – அல்லு அர்ஜுன் கூட்டணியில் உருவாகும் படம் இந்த ஆண்டு ஆகஸ்ட் மாதத்தில் படப்பிடிப்பு தொடங்கும் என எதிர்பார்க்கப்படுகிறது. இது அல்லு அர்ஜுனின் 23வது படமாக உருவாகிறது. இப்படத்திற்கு அனிருத் ரவிச்சந்தர் இசையமைக்கிறார். மேலும், இந்த படத்திற்காக லோகேஷ் கனகராஜ் ரூ.75 கோடி சம்பளம் பெறுவதாகவும் தகவல்கள் வெளியாகியுள்ளன.

ஆனால், இந்த படத்திற்கு முன்பாக அல்லு அர்ஜுன், இயக்குநர் அட்லீ இயக்கும் தனது 22வது படத்தில் நடித்து முடிக்க உள்ளார். அந்த படம் மிகப்பெரிய பட்ஜெட்டில், விஎஃப்எக்ஸ்-க்கு முக்கியத்துவம் அளித்து உருவாகி வருகிறது. சன் பிக்சர்ஸ் தயாரிக்கும் இந்த படத்தின் கதைக்களம் ‘பேரலல் யுனிவர்ஸ்’ மையமாக அமைந்ததாகவும், இதில் அல்லு அர்ஜுன் மூன்று வேடங்களில் நடிப்பதாகவும் கூறப்படுகிறது. ஒரு வேடம் அனிமேஷன் கதாபாத்திரமாக இருக்கலாம் என்ற தகவலும் வெளியாகியுள்ளது. இப்படத்தின் பட்ஜெட் ரூ.800 கோடி என சொல்லப்படுகிறது.

இந்த சூழலில், லோகேஷ் கனகராஜ் தொடர்ந்து பெரிய நட்சத்திரங்களுடன் பிரம்மாண்ட படங்களில் பிஸியாக இருப்பதால், ‘கைதி 2’ எப்போது உருவாகும் அல்லது உண்மையிலேயே அது தற்காலிகமாக ஒத்திவைக்கப்பட்டதா, இல்லையா என்ற கேள்வி ரசிகர்கள் மத்தியில் தொடர்ந்தும் நிலவி வருகிறது. லோகேஷ் கனகராஜ் தரப்பில் இருந்து அதிகாரப்பூர்வ விளக்கம் வரும் வரை, ‘கைதி 2’ குறித்த எதிர்பார்ப்பும் சந்தேகமும் ஒரே நேரத்தில் ரசிகர்களை விட்டு விலகாது என்பதே தற்போதைய நிலை.