திரையுலகில் பல விமர்சனங்கள், ட்ரோல்கள் மற்றும் சவால்களை சந்தித்தாலும் ஒருபோதும் மனம் தளராமல் முன்னேறிய நடிகை ராஷ்மிகா மந்தனா, தனது சினிமா வாழ்க்கையின் 9 ஆண்டுகளை நிறைவு செய்துள்ளதை உணர்ச்சிப்பூர்வமாக கொண்டாடியுள்ளார். தென்னிந்திய திரையுலகில் இருந்து பாலிவுட் வரை தனது புன்னகையால் கோடிக்கணக்கான ரசிகர்களின் இதயங்களை வென்ற ‘நேஷனல் க்ரஷ்’ ராஷ்மிகா, இந்த பயணத்தின் முழு பெருமையையும் ரசிகர்களுக்கே அர்ப்பணித்துள்ளார்.

இன்ஸ்டாகிராமில் நீண்ட பதிவு ஒன்றை பகிர்ந்த ராஷ்மிகா, “நான் இன்றுவரை வாழ்வதற்கும், இந்த இடத்தில் நிற்பதற்கும் காரணம் நீங்கள்தான். என் ஒவ்வொரு ஏற்றத் தாழ்விலும் நீங்கள் என்னுடன் இருந்தீர்கள். உங்கள் தன்னலமற்ற அன்பும் ஆதரவும் இல்லாமல் இந்த பயணம் சாத்தியமில்லை” என்று நன்றி தெரிவித்துள்ளார். கன்னட திரையுலகில் ‘கிரிக் பார்ட்டி’ படத்தின் மூலம் அறிமுகமான அவர், ‘கீத கோவிந்தம்’, ‘புஷ்பா’ போன்ற படங்களின் மூலம் பான்-இந்தியா நட்சத்திரமாக உயர்ந்தார். பாலிவுட்டில் ‘அனிமல்’ படத்தின் வெற்றி அவரது புகழை மேலும் உயர்த்தியது.

விமர்சனங்கள் மற்றும் ட்ரோல்கள் இருந்தபோதும் அவற்றை தாண்டி தன்னம்பிக்கையுடன் பயணித்த ராஷ்மிகா, ரசிகர்களின் ஆதரவே தன்னை தொடர்ந்து சிறப்பாக செயல்பட தூண்டுவதாக கூறியுள்ளார். தற்போது ‘புஷ்பா 2’, ‘குபேரா’ உள்ளிட்ட படங்களில் பிஸியாக இருக்கும் ராஷ்மிகாவுக்கு திரையுலகினர் மற்றும் ரசிகர்கள் வாழ்த்துகளை குவித்து வருகின்றனர். இதனிடையே, நடிகர் விஜய் தேவரகொண்டாவுடன் அவரது திருமணம் 2026 பிப்ரவரி 26 அன்று உதய்பூரில் நடைபெறலாம் என்ற தகவல்கள் பரவி வருகின்றன. ஆனால், இந்த விஷயத்தை இருவரும் இதுவரை அதிகாரப்பூர்வமாக உறுதிப்படுத்தவில்லை.