சூப்பர் ஸ்டார் ரஜினிகாந்த் நடிப்பில் பிரம்மாண்டமாக உருவாகி வரும் திரைப்படம் ஜெயிலர் 2. இயக்குநர் நெல்சன் திலீப்குமார் இயக்கும் இந்த படத்தைச் சுற்றி ரசிகர்களிடையே எதிர்பார்ப்பு நாளுக்கு நாள் அதிகரித்து வருகிறது. இந்த நிலையில், ஜெயிலர் 2 தொடர்பாக வெளியாகியுள்ள புதிய அப்டேட் ஒன்று ரசிகர்களை பெரும் உற்சாகத்தில் ஆழ்த்தியுள்ளது.

அதன்படி, பாலிவுட் சூப்பர் ஸ்டார் ஷாருக்கான் ஜெயிலர் 2 படத்தில் இணைந்துள்ளதாக தகவல்கள் வெளியாகியுள்ளன. இதை படத்தில் முக்கிய வில்லன் வேடத்தில் நடித்து வரும் நடிகர் மிதுன் சக்ரவர்த்தி சமீபத்திய பேட்டி ஒன்றில் உறுதி செய்துள்ளதாக கூறப்படுகிறது. ரஜினிகாந்த் படத்தில் ஷாருக்கான் நடிப்பது பான்-இந்தியா சினிமாவிற்கு புதிய திசையை கொடுக்கும் முக்கிய நிகழ்வாக பார்க்கப்படுகிறது.

ஷாருக்கானின் கதாபாத்திரம் குறித்து தற்போது வரை எந்த அதிகாரப்பூர்வ தகவலும் வெளியிடப்படவில்லை. இருப்பினும், இது ஒரு சிறப்பு தோற்றமாக இருக்கலாம் என்றும், நெல்சனின் பாணியைப் பொருத்தவரை அந்த கதாபாத்திரம் மிகவும் முக்கியமானதாகவும் வலுவான தாக்கத்தை ஏற்படுத்தக்கூடியதாகவும் இருக்கும் என திரையுலக வட்டாரங்கள் தெரிவிக்கின்றன.

ஜெயிலர் 2 படத்தில் ரஜினிகாந்துடன் மோகன்லால், சிவராஜ்குமார், சந்தானம், எஸ்.ஜே.சூர்யா, விஜய் சேதுபதி, சூரஜ் வெஞ்சரமூடு, மிதுன் சக்ரவர்த்தி, வித்யா பாலன் உள்ளிட்ட மிகப் பெரிய நட்சத்திர பட்டாளம் இணைந்துள்ளது. தற்போது படத்தின் படப்பிடிப்பு இறுதிக்கட்டத்தை எட்டி உள்ளதாகவும், 2026 ஆம் ஆண்டு ஜூன் 12ஆம் தேதி திரையரங்குகளில் படம் வெளியாகும் எனவும் தகவல்கள் தெரிவிக்கின்றன.

2023ஆம் ஆண்டு வெளியான ஜெயிலர் திரைப்படம், 220 கோடி ரூபாய் பட்ஜெட்டில் உருவாகி உலகளவில் சுமார் 650 கோடி ரூபாய் வசூல் செய்து மாபெரும் வெற்றியைப் பெற்றது. ஓய்வுபெற்ற ஜெயிலராக ரஜினிகாந்த் நடித்த அந்த படம், ஆக்ஷன் மற்றும் நகைச்சுவை கலந்த கதையமைப்பால் ரசிகர்களிடையே பெரும் வரவேற்பை பெற்றது. அந்த வெற்றியைத் தொடர்ந்து உருவாகும் ஜெயிலர் 2 படத்தில், ஷாருக்கானின் இணைப்பு உண்மையாகும் பட்சத்தில், அது இந்திய சினிமாவின் மிகப்பெரிய சர்ப்ரைஸாக அமையும் என ரசிகர்கள் எதிர்பார்ப்புடன் காத்திருக்கின்றனர்.