இந்திய இருசக்கர வாகன சந்தையில் 2026 ஜூன் மாத ஸ்கூட்டர் விற்பனை விவரங்கள் வெளியாகியுள்ளன. இதில், ஹோண்டா ஆக்டிவா மீண்டும் அதிகம் விற்பனையான ஸ்கூட்டராக முதலிடத்தை தக்கவைத்துள்ளது. அதேசமயம், பெட்ரோல் ஸ்கூட்டர்களுடன் மின்சார ஸ்கூட்டர்களின் விற்பனையும் கணிசமாக உயர்ந்திருப்பது சந்தையின் முக்கிய அம்சமாக உள்ளது.

ஜூன் 2026-ல் ஹோண்டா ஆக்டிவா 2,18,932 யூனிட்கள் விற்பனையாகி, கடந்த ஆண்டின் இதே மாதத்துடன் ஒப்பிடும்போது சுமார் 19% வளர்ச்சியை பதிவு செய்துள்ளது. தொடர்ந்து, டிவிஎஸ் ஜூபிடர் 1,36,805 யூனிட்கள் விற்பனையுடன் இரண்டாவது இடத்தையும், சுசுகி ஆக்ஸஸ் 63,121 யூனிட்கள் விற்பனையுடன் மூன்றாவது இடத்தையும் பிடித்துள்ளன. இந்த இரு மாடல்களும் முறையே சுமார் 27% மற்றும் 22% ஆண்டு வளர்ச்சியை பதிவு செய்துள்ளன.

மின்சார ஸ்கூட்டர் பிரிவிலும் வளர்ச்சி தொடர்கிறது. டிவிஎஸ் iQube 47,331 யூனிட்கள் விற்பனையுடன் சுமார் 232% ஆண்டு வளர்ச்சியை பதிவு செய்து நான்காவது இடத்தைப் பிடித்துள்ளது. பஜாஜ் சேட்டக் 40,376 யூனிட்களுடன் 126% வளர்ச்சியையும், ஈத்தர் ரிஸ்டா 24,742 யூனிட்களுடன் 97% வளர்ச்சியையும் பதிவு செய்துள்ளன. மின்சார ஸ்கூட்டர்களுக்கான தேவை நகரங்களைத் தாண்டி பிற பகுதிகளிலும் அதிகரித்து வருவதாக சந்தைத் தரவுகள் காட்டுகின்றன.

ஜூன் 2026-க்கான அதிகம் விற்பனையான ஸ்கூட்டர்களின் பட்டியலில் டிவிஎஸ் என்டார்க், யமஹா ரேZR, சுசுகி பர்க்மேன் மற்றும் ஹீரோ டெஸ்டினி 125 உள்ளிட்ட மாடல்களும் இடம்பெற்றுள்ளன. இம்மாடல்களும் கடந்த ஆண்டை ஒப்பிடுகையில் நல்ல வளர்ச்சியை பதிவு செய்துள்ளதால், இந்திய ஸ்கூட்டர் சந்தையில் போட்டி மேலும் தீவிரமடைந்துள்ளது.

மொத்த விற்பனையைப் பொறுத்தவரை, பெட்ரோல் ஸ்கூட்டர்களே இன்னும் சந்தையில் ஆதிக்கம் செலுத்துகின்றன. இருப்பினும், மின்சார இருசக்கர வாகனங்களின் சந்தைப் பங்கும் தொடர்ந்து அதிகரித்து வருகிறது. ஜூன் மாதத்தில் இந்திய இருசக்கர வாகன பதிவுகளில் மின்சார வாகனங்களின் பங்கு 10 சதவீதத்தைத் தாண்டியுள்ளதாகவும், வரவிருக்கும் மாதங்களில் இந்தப் போட்டி மேலும் விறுவிறுப்பாக இருக்கும் எனத் துறை வல்லுநர்கள் மதிப்பிடுகின்றனர்.