பிரெஞ்சு கார் தயாரிப்பு நிறுவனமான ரெனால்ட், உலக சந்தையில் தனது பிரீமியம் பிரிவை பலப்படுத்தும் நோக்கில் புதிய முழு ஹைப்ரிட் கிராஸ்ஓவர் எஸ்யூவியான ‘ரெனால்ட் ஃபிலாண்டே’ மாடலை அறிமுகப்படுத்தியுள்ளது. தென் கொரியாவில் முதன்முதலாக அறிமுகமான இந்த மாடல், ஆசிய மற்றும் மத்திய கிழக்கு சந்தைகளை குறிவைத்து உருவாக்கப்பட்டுள்ளது. ரெனால்ட்டின் 2027 சர்வதேச வளர்ச்சி திட்டத்தில் இது முக்கியமான “ஃபிளாக்ஷிப்” மாடலாக பார்க்கப்படுகிறது.

ரெனால்ட்டின் லேண்ட் ஸ்பீட் முன்மாதிரிகளில் இருந்து ஊக்கமளித்து பெயரிடப்பட்டுள்ள ஃபிலாண்டே, நிறுவனத்தின் பிரீமியம் பிரிவில் மீண்டும் வலுவான நுழைவைக் குறிக்கிறது. வெளிப்புற வடிவமைப்பில் வலுவான முன்பக்கம், ஈரோடைனமிக் மடிப்புகள் மற்றும் நவீன லைட்டிங் சிக்னேச்சர் இடம்பெற்றுள்ளன. இரட்டை-பேரல் எல்இடி ஹெட்லெம்ப்கள், கூர்மையான எல்இடி டிஆர்எல், சிறிய எல்இடி கூறுகளுடன் கூடிய கிரில் வடிவமைப்பு ஆகியவை இந்த எஸ்யூவிக்கு தனித்துவமான மற்றும் பிரீமியம் தோற்றத்தை வழங்குகின்றன. பக்கவாட்டில் கூர்மையான கோடுகளும், பின்னால் பெரிய பம்பர் அமைப்பும் இதன் ஸ்போர்ட்டி லுக்கை மேலும் உயர்த்துகின்றன.

கேபினுக்குள் நுழைந்தவுடன் எதிர்காலத் தோற்றம் கொண்ட உயர்தர வசதிகள் பயணிகளை வரவேற்கின்றன. 4,915 மிமீ நீளம் மற்றும் 2,820 மிமீ வீல்பேஸ் கொண்ட ஃபிலாண்டே, ரெனால்ட்டின் இதுவரை மிக நீளமான மாடல்களில் ஒன்றாகும். பின்புற பயணிகளுக்கு 320 மிமீ லெக்ரூம், 654 லிட்டர் பூட் ஸ்பேஸ் போன்ற விசாலமான இடவசதிகள் வழங்கப்பட்டுள்ளன. முக்கிய ஹைலைட்டாக, இன்ஸ்ட்ரூமென்ட் கிளஸ்டர், இன்ஃபோடெயின்மென்ட் மற்றும் பயணிகள் டிஸ்ப்ளே என மூன்று 12.3-இன்ச் டிஜிட்டல் ஸ்கிரீன்கள் வழங்கப்பட்டுள்ளன. இதனுடன், ஓட்டுநருக்காக 25.6-இன்ச் AR ஹெட்-அப் டிஸ்ப்ளேவும் இடம்பெற்றுள்ளது.

இன்ஜின் மற்றும் பவர்டிரெய்ன் விஷயத்தில், ஃபிலாண்டே ஜீலி CMA பிளாட்ஃபார்மில் உருவாக்கப்பட்டுள்ளது. இதில் E-Tech 250 முழு ஹைப்ரிட் சிஸ்டம் வழங்கப்பட்டுள்ளது. 1.5-லிட்டர் டர்போ பெட்ரோல் இன்ஜின், இரண்டு எலக்ட்ரிக் மோட்டார்கள் மற்றும் 1.64 kWh பேட்டரி ஆகியவை இணைந்து செயல்படுகின்றன. 3-ஸ்பீட் DHT Pro ஆட்டோமேட்டிக் கியர்பாக்ஸுடன் வரும் இந்த எஸ்யூவி, சுமார் 247 hp பவர் மற்றும் 565 Nm டார்க் வழங்கும் என தகவல்கள் தெரிவிக்கின்றன.

தென் கொரியாவின் புசான் ஆலையில் தயாரிக்கப்படும் ரெனால்ட் ஃபிலாண்டே, 2026 மார்ச் மாதத்தில் சந்தையில் அறிமுகமாகும் என எதிர்பார்க்கப்படுகிறது. ஆனால் தற்போதைய நிலையில் இந்த மாடல் இந்திய சந்தைக்கு கொண்டு வரப்படுவதற்கான திட்டம் இல்லை எனவும் கூறப்படுகிறது. இருப்பினும், உலகளாவிய பிரீமியம் ஹைப்ரிட் எஸ்யூவி சந்தையில் ரெனால்ட்டின் புதிய அடையாளமாக ஃபிலாண்டே பார்க்கப்படுகிறது.