பெரிய குடும்பத்திற்காக 7-சீட்டர் கார் வாங்க வேண்டும் என்ற ஆசை பலருக்கும் இருக்கும். ஆனால் பட்ஜெட் ஒரு முக்கியமான காரணமாக இருக்கும். இந்திய ஆட்டோமொபைல் சந்தையில் தற்போது ரூ.10 லட்சத்திற்குள் நல்ல இடவசதி, மைலேஜ் மற்றும் பயனுள்ள வசதிகளுடன் பல 7-சீட்டர் கார்கள் கிடைக்கின்றன. நகரப் பயணங்களுக்கும், நீண்ட தூர பயணங்களுக்கும் ஏற்ற சில முக்கிய மாடல்களைப் பார்க்கலாம்.

மஹிந்திரா பொலிரோ
இந்தியாவில் பல ஆண்டுகளாக நம்பிக்கைக்குரிய எஸ்யூவி மாடலாக இருக்கும் மஹிந்திரா பொலிரோ, அதன் வலிமை மற்றும் நீடித்த பயன்பாட்டுக்காக பிரபலமானது. சுமார் ரூ.8 லட்சம் ஆரம்ப விலையில் கிடைக்கும் இந்த கார், குறிப்பாக கிராமப்புற சாலைகள் மற்றும் கடினமான பாதைகளுக்கு ஏற்றதாக கருதப்படுகிறது. குடும்பப் பயணங்களுக்கு இது ஒரு வலுவான தேர்வாக உள்ளது.

மாருதி சுசூகி எர்டிகா
குடும்பங்களுக்கிடையே மிகவும் பிரபலமான 7-சீட்டர் கார்களில் ஒன்றாக மாருதி எர்டிகா உள்ளது. இதன் விலை ரூ.8.80 லட்சம் முதல் ரூ.12.94 லட்சம் வரை இருக்கும். 1.5 லிட்டர் பெட்ரோல் இன்ஜினுடன் வரும் இந்த கார், CNG தேர்வும் கொண்டுள்ளது. CNG மாடலில் ஒரு கிலோவுக்கு 26.11 கிலோமீட்டர் வரை மைலேஜ் கிடைக்கும். வசதியான கேபின் மற்றும் நீண்ட பயணங்களுக்கு ஏற்ற அமைப்பு இதன் பலமாகும்.

ரெனோ டிரைபர்
பட்ஜெட்டில் 7-சீட்டர் கார் தேடுபவர்களுக்கு ரெனோ டிரைபர் சிறந்த தேர்வாக உள்ளது. ரூ.5.76 லட்சம் ஆரம்ப விலையில் கிடைக்கும் இந்த மாடல், 1.0 லிட்டர் பெட்ரோல் இன்ஜினுடன் வருகிறது. தேவைக்கேற்ப சீட்களை மாற்றி அமைக்கும் வசதி இதன் முக்கிய அம்சமாகும். மூன்றாவது வரிசை சீட்களை அகற்றினால் பெரிய பூட் ஸ்பேஸ் கிடைக்கும் என்பதால் குடும்பப் பயணங்களுக்கு மிகவும் பயனுள்ளதாக இருக்கும்.

மஹிந்திரா பொலிரோ நியோ
பொலிரோவின் நவீன வடிவமாகக் கருதப்படும் பொலிரோ நியோ, ரூ.8.84 லட்சம் முதல் கிடைக்கிறது. மேம்பட்ட இன்டீரியர், நவீன வசதிகள் மற்றும் சக்திவாய்ந்த டீசல் இன்ஜின் இதன் முக்கிய அம்சங்கள். நகரமும், கிராமப்புறங்களும் என இருவிதமான பயன்பாட்டிற்கும் ஏற்ற வகையில் வடிவமைக்கப்பட்டுள்ளது.

நிஸான் கிராவிட்
சமீபத்தில் இந்திய சந்தையில் அறிமுகமான நிஸான் கிராவிட், ரூ.5.65 லட்சம் ஆரம்ப விலையில் கிடைக்கிறது. இது ரெனோ டிரைபர் பிளாட்ஃபார்மை அடிப்படையாகக் கொண்டாலும், வயர்லெஸ் சார்ஜிங், ஆம்பியன்ட் லைட்டிங் போன்ற கூடுதல் வசதிகளுடன் வருகிறது. மாடர்ன் அம்சங்களுடன் கூடிய குறைந்த விலை 7-சீட்டர் கார் தேடுபவர்களுக்கு இது ஒரு நல்ல தேர்வாக பார்க்கப்படுகிறது.

பட்ஜெட், பயன்பாடு மற்றும் குடும்பத் தேவைகளைப் பொறுத்து இந்த மாடல்களில் ஏதேனும் ஒன்றைத் தேர்வு செய்யலாம். வாங்குவதற்கு முன் டெஸ்ட் டிரைவ் செய்து, வசதிகள் மற்றும் பராமரிப்பு செலவுகளை ஒப்பிட்டு முடிவு செய்வது நல்லது.