தமிழ் சினிமாவின் முன்னணி நடிகர்களில் ஒருவராக இருக்கும் அஜித்குமார், நடிப்பைத் தாண்டி கார் ரேஸிங்கிலும் தனித்த அடையாளம் பதித்து வருகிறார். சமீபத்தில் சர்வதேச கார் பந்தயத்தில் வெற்றி பெற்றதன் மூலம், தனது பழைய ஆர்வத்தை மீண்டும் நிரூபித்துள்ளார். இதேநேரத்தில், அவரது சினிமா பயணமும் அடுத்த கட்டத்துக்கு நகரத் தயாராகி வருகிறது.

தற்போது அஜித், இயக்குநர் ஆதிக் ரவிச்சந்திரன் இயக்கத்தில் புதிய படத்தில் நடிக்க உள்ளதாக தகவல்கள் வெளியாகியுள்ளன. அதனைத் தொடர்ந்து வெங்கட் பிரபுவின் மங்காத்தா 2 மற்றும் இயக்குநர் சிவா இயக்கும் புதிய படங்களிலும் அவர் இணைய வாய்ப்பு இருப்பதாக கூறப்படுகிறது.

சினிமாவில் எந்தப் பின்னணியும் இல்லாமல் நுழைந்து, பல ஏற்றத் தாழ்வுகளைக் கடந்து இன்று தனக்கென பெரிய ரசிகர் வட்டத்தையும், தனி இடத்தையும் உருவாக்கியுள்ளார் அஜித். கடந்த ஆண்டு வெளியான விடாமுயற்சி மற்றும் குட் பேட் அக்லி படங்கள் கலவையான வரவேற்பைப் பெற்றிருந்தாலும், வசூல் ரீதியாக தயாரிப்பு நிறுவனங்களுக்கு நம்பிக்கை அளித்ததாக கூறப்பட்டது.

இந்த நிலையில், நடிகையும் முன்னாள் அரசியல்வாதியுமான ரோஜா, குக் வித் கோமாளி நிகழ்ச்சியில் பங்கேற்றபோது அஜித் பற்றிய பழைய நினைவுகளை பகிர்ந்துள்ளார்.

அவர் கூறியதாவது:“நானும் அஜித்தும் உன்னிடத்தில் என்னை கொடுத்தேன் படத்தில் சேர்ந்து நடித்தோம். அப்போது அவர் வளர்ந்து கொண்டிருந்த நடிகர். மிகவும் எளிமையானவராக இருந்தார். அந்தப் படத்தில் நான் கார்த்திக்குக்கு ஜோடி, அஜித் எனக்கு ஜோடி. ஷூட்டிங் இடைவெளிகளில் நாங்கள் மூவரும் சேர்ந்து நிறைய பேசுவோம், சிரிப்போம். மிகவும் நல்ல அனுபவமாக இருந்தது.”மேலும், அஜித்தின் சமையல் திறமையைப் பற்றியும் ரோஜா குறிப்பிட்டார்.

“அவருக்கு அப்போதே சமையல் நன்றாகத் தெரியும். எனக்கு சிக்கன் ரொம்ப பிடிக்கும் என்று தெரிந்ததும், அவர் தனியாக சமைத்து கொடுத்தது இன்னும் நினைவில் இருக்கிறது,” என்று கூறினார்.

அஜித் குறித்து ரோஜா பகிர்ந்த இந்த நினைவுகள், அவரது ரசிகர்களிடையே கவனத்தை ஈர்த்துள்ளன. திரை உலகில் மட்டுமல்லாமல், தனிப்பட்ட உறவுகளிலும் அஜித் எளிமை மற்றும் அன்புடன் நடந்துகொண்டவர் என்பதற்கான இன்னொரு உதாரணமாக இதைப் பார்க்க ரசிகர்கள் தொடங்கியுள்ளனர்.