நவம்பர் 17 முதல் இலங்கையில் இடைவிடாத மழை பொழிந்து கொண்டே வருகிறது. இடியுடன் கூடிய மழை நாடெங்கும் கொட்டிக் கொட்டிப் பெய்ததால், நிலச்சரிவு, வெள்ளப்பெருக்கு என பெரும் பேரிடர் சூழல் உருவாகியுள்ளது. பல மாவட்டங்களில் வீதிகள் ஆறென பெருக்கெடுத்து ஓட, பொதுமக்களின் இயல்பான வாழ்க்கை முற்றிலும் சீர்குலைந்து கிடக்கிறது.

இந்த கடும் மழை பாதிப்பில் இதுவரை 69 பேர் உயிரிழப்பு, 34 பேர் காணாமல் போனவர்கள் என இலங்கை தேசிய பேரிடர் மேலாண்மை மையம் இன்று அறிவித்துள்ளது. பலர் படுகாயங்களுடன் சிகிச்சை பெற்று வருகின்றனர்.

இதேநேரத்தில், 63,000க்கும் மேற்பட்ட குடும்பங்களை சேர்ந்த 2.19 லட்சம் பேர் வெள்ளத்தால் கடுமையாக பாதிக்கப்பட்டுள்ளனர். 4 வீடுகள் முழுமையாக இடிந்து நொறுங்கியுள்ளன; மேலும் 666 வீடுகள் பகுதியளவில் சேதமடைந்துள்ளன. அவசர உதவி தேவைப்படும் பொதுமக்கள் 117 என்ற ஹெல்ப்லைன் எண்ணில் தொடர்புகொள்ளலாம் என அரசு அறிவிப்பு வெளியிடப்பட்டுள்ளது.

நிவாரணமும் மீட்பும் தடை இல்லாமல் நடைபெற மாவட்ட ஆட்சியர்களுக்கு இலங்கை ஜனாதிபதி அனுர குமார திசாநாயக்க நேரடி உத்தரவு பிறப்பித்துள்ளார். தற்போது மீட்பு முயற்சிகள் வேகமாக முன்னெடுக்கப்பட்டு வருகின்றன.இதற்கிடையில் பேரிடர் தாக்கத்தை முன்னிட்டு அண்டை நாடான இந்தியா உடனடி உதவியுடன் களத்தில் இறங்கியுள்ளது.

‘ஆபரேசன் சாகர்பந்து’ எனப்படும் மனிதாபிமான நிவாரண நடவடிக்கையின் மூலம் இலங்கைக்கு தொடர்ச்சியாக ராணுவ மற்றும் மருத்துவ உதவி வழங்கப்படுகிறது.

INS விக்ராந்த், INS உதயகிரி போன்ற இந்திய கடற்படை கப்பல்கள் மூலம் கொழும்பு துறைமுகத்தை சென்றடைந்த நிவாரண பொருட்கள் ஏற்கனவே வழங்கப்பட்டுள்ளன. மேலும், இந்திய விமானப்படையின் C-130J விமானம் வழியாக இன்று காலையிலும் கூடாரங்கள், தார்ப்பாய்கள், போர்வைகள், சுகாதார பொருட்கள் மற்றும் உடனடியாக உபயோகிக்கக் கூடிய உணவுப் பொருட்கள் உள்ளிட்ட 12 டன் உதவி சரக்கு அனுப்பி வைக்கப்பட்டது.

இதற்கிடையில், டிட்வா புயல் தாக்கம் அதிகரித்துள்ளதால் கேகாலை மாவட்டத்தில் புதிய மண்சரிவு ஏற்பட்டது. இதில் 20 குழந்தைகள் உட்பட 120 பேர் வரை காணாமல் போயிருக்கலாம் என்ற அச்சம் நிலவுகிறது. அதோடு அனுராதபுரத்திலும் 100-க்கும் மேற்பட்ட புத்த பிக்குகள் பலத்த பாதிப்புக்குள்ளாகி மீட்பு உதவி எதிர்பார்த்துள்ளனர்.

மீட்பு குழுக்கள் இரவு பகலின்றி தேடுதல் பணியில் ஈடுபட்டுள்ளன.இப்போது டிட்வா புயல் சென்னைக்கு தெற்கே 380 கி.மீ தூரத்தில், வட இலங்கை கடல் பகுதியை நெருங்கிக் கொண்டிருக்கிறது. புயல் வலு அதிகரிக்கும் நிலையில், இலங்கையில் மீண்டும் பல்வேறு இடங்களில் மண்சரிவு ஏற்படும் அபாயம் மிக உயர்ந்துள்ளது.