மத்திய ஆப்பிரிக்க நாடான காங்கோவின் ருபாயா பகுதியில் உள்ள கனிமச் சுரங்கம் இடிந்து விழுந்ததில், 200-க்கும் மேற்பட்ட தொழிலாளர்கள் மண்ணில் புதைந்து உயிரிழந்தனர். ஸ்மார்ட்போன், லேப்டாப் மற்றும் விமான என்ஜின்கள் தயாரிப்பில் மிக முக்கியமான 'கோல்டன்' (Coltan) தாது வெட்டியெடுக்கப்படும்போது இந்தச் சோகம் நிகழ்ந்துள்ளது.

மறைக்கப்படும் மரணங்கள்:
இந்தச் சுரங்கப் பகுதி தற்போது ரவாண்டா ஆதரவு பெற்ற எம்.23 (M23) என்ற கிளர்ச்சிக் குழுவின் முழு கட்டுப்பாட்டில் உள்ளது. விபத்து குறித்துப் பேசிய கிளர்ச்சிக் குழுவினர் "வெறும் 5 பேர் மட்டுமே இறந்தனர்" என மழுப்பினாலும், மீட்புப் பணியில் ஈடுபட்ட தொழிலாளர்கள் 200-க்கும் மேற்பட்ட உடல்களை நேரில் மீட்டுள்ளதாகப் பகீர் தகவலை வெளியிட்டுள்ளனர். உண்மை வெளியே கசிந்தால் தங்களுக்கு ஆபத்து எனச் சுரங்க உரிமையாளர்கள் மிரட்டுவதாகவும் அவர்கள் வேதனை தெரிவிக்கின்றனர்.

தொழில்நுட்பத்தின் பின்னால் இருக்கும் 'இரத்தம்':
உலகத் தேவையில் 15 சதவீதத்திற்கும் அதிகமான 'டான்டலம்' உலோகம் இந்த ருபாயா சுரங்கத்திலிருந்தே கிடைக்கிறது. இது வெப்பத்தைத் தாங்கும் திறன் கொண்டதால் மின்னணுப் பொருட்களின் மின்தேக்கிகள் (Capacitors) தயாரிக்கப் பயன்படுத்தப்படுகிறது.

கிளர்ச்சியாளர்களின் லாப வேட்டை:
கடந்த மே மாதம் முதல் இந்தச் சுரங்கத்தை ஆக்கிரமித்துள்ள கிளர்ச்சியாளர்கள், அங்கிருந்து எடுக்கப்படும் கனிமங்களுக்கு வரி விதிப்பதன் மூலம் மாதம் தோறும் சுமார் ரூ.6.7 கோடி ($8 லட்சம்) வருமானம் ஈட்டி வருகின்றனர். பாதுகாப்பற்ற சூழலில் கிளர்ச்சியாளர்களின் பிடியில் சிக்கித் தொழிலாளர்கள் கொத்து கொத்தாகப் பலியாகி வருவது உலக நாடுகளிடையே அதிர்ச்சியை ஏற்படுத்தியுள்ளது. ஏற்கனவே கடந்த மாதம் இதேபோன்ற ஒரு விபத்தில் 200 பேர் பலியானது குறிப்பிடத்தக்கது.