ஒவ்வொரு ஆண்டும் தொடக்கத்தில் நாஸ்ட்ராடாமஸ், பாபா வாங்கா, ரியோ டாட்ஸ்கி (மங்கா கணிப்பாளர்) போன்றோரின் தீர்க்கதரிசனங்கள் பெரும் பரபரப்பை ஏற்படுத்தும். ஆனால் ஆண்டு முடிவில், அவை எவ்வளவு நிஜமானதாக அமைந்தது என்பதைப் பற்றி யாரும் பெரிதாக பேசுவதில்லை. இவ்வாண்டு, 2025, அவர்களின் கணிப்புகள் நிஜத்துடன் எவ்வளவு பொருந்தின என்ற விவரத்தை பார்ப்போம்.

பாபா வாங்கா 2025 பற்றி பல கணிப்புகள் செய்ததாக சமூக வலைதளங்களில் பரவியது. உலகளாவிய பொருளாதார வீழ்ச்சி, ஆசியாவில் பெரிய இயற்கை சீற்றம், புற்றுநோய் சிகிச்சையில் புரட்சியுடனான முன்னேற்றம் ஆகியவை அவற்றில் முக்கியமானவை. உண்மையில், உலகளாவிய பொருளாதார வீழ்ச்சி நிகழவில்லை. சந்தைகள் அதிர்வுகளைக் கண்டன, ஆனால் பெரும் சரிவு ஒன்றும் இல்லை. ஆசியாவில் பல புயல்கள், நிலநடுக்கங்கள் இடம்பெற்றன; ஆனால் அவர் கூறியது போல் பேரழிவு நிகழவில்லை. புற்றுநோய் சிகிச்சை குறித்த அவரது கணிப்பு மட்டும் ஓரளவு பொருந்தியது. பல நாடுகளில் புதிய மரபணு சிகிச்சைகள், முன்முயற்சிகள் கவனம் பெற்றன.

நாஸ்ட்ராடாமஸ் கணிப்புகளும் வழக்கம்போல உலகின் கவனத்தைக் குவித்தன. ஆட்சி மாற்றங்கள், தீவிர காலநிலை மாற்றம், தொழில்நுட்ப புரட்சி ஆகியவை குறித்து கூறியிருந்தனர். ஆனால் எந்த பெரிய நாட்டின் தலைவரும் வீழ்ச்சி அடையவில்லை. காலநிலை மாற்றம் தீவிரமடைந்தது உண்மைதான்; ஐரோப்பாவில் வெப்ப அலைகள், காட்டுத்தீ அனுபவிக்கப்பட்டன. ஏஐ கட்டுப்பாடுகள், குவாண்டம் ஆராய்ச்சி உள்ளிட்ட துறைகளில் அவர் கூறியதை ஒத்த முன்னேற்றங்கள் ஏற்பட்டன. முழுமையாக பொருந்தவில்லை என்றாலும், பகுதி உண்மைகள் சில இருந்தன.

ஜப்பானின் மங்கா தீர்க்கதரிசனங்கள் உலகம் முழுவதும் 2025 இல் அதிகமாக பேசப்பட்டன. ரியோ டாட்ஸ்கியின் "நான் கண்ட எதிர்காலம்" நூலில் 2025 ஜூலை மாதம் மிகப்பெரிய சுனாமி வரும் என கூறப்பட்டிருந்தது. 2011 ஜப்பான் அனுபவித்ததை விட மூன்று மடங்கு தாக்கத்துடன் வரும் என அவர் எழுதியிருந்தார். ஜப்பான், பிலிப்பைன்ஸ், தைவான் உள்ளிட்டவை பாதிக்கப்படும் என அவரது கணிப்பு பரவலாக பேசப்பட்டது. இதனால் பலர் பயணத் திட்டங்களை ரத்து செய்தனர். ஆனால் அவர் கூறிய அளவில் ஒரு பெரிய சுனாமி எங்கும் உருவாகவில்லை.

மொத்தத்தில், 2025 பற்றிய இந்த மூன்று பிரபல கணிப்பாளர்களின் தீர்க்கதரிசனங்களில் சில செய்திகள் நிஜத்துடன் ஓரளவு ஒத்துப்போனாலும், பெரும்பாலான கணிப்புகள் சத்தியமாகவில்லை. ஆண்டு தொடக்கத்தில் ஏற்படுத்திய பீதிக்கும் பரபரப்புக்கும் இணையாக, ஆண்டின் இறுதியில் அவை எந்தப் பெரும் விளைவையும் ஏற்படுத்தவில்லை என்பதே உண்மை.