சென்னை வானிலை ஆய்வு மையம் வெளியிட்டுள்ள சமீபத்திய அறிக்கையின் படி, அடுத்த ஏழு நாட்களுக்கு தமிழகத்தில் மாறுபட்ட வானிலை நிலைகள் காணப்படும் என தெரிவிக்கப்படுகிறது.

தென்தமிழக கடலோரப் பகுதிகளின் மேல் வளிமண்டலத்தின் கீழடுக்கு பகுதியில் சுழற்சி உருவாகியுள்ளதுடன், சுமார் 0.9 கிலோமீட்டர் உயரத்தில் கிழக்கு விதர்பா முதல் குமரிக்கடல் வரை தெலங்கானா, உள் கர்நாடகா மற்றும் தமிழகம் வழியாக காற்றழுத்த தாழ்வு பாதை நிலவி வருகிறது.

இதன் தாக்கமாக, 24-04-2026 முதல் 27-04-2026 வரை மேற்கு தொடர்ச்சி மலை சார்ந்த மாவட்டங்களிலும், தென்தமிழக கடலோரப் பகுதிகளிலும் ஓரிரு இடங்களில் லேசானது முதல் மிதமான மழை பெய்யும் வாய்ப்பு உள்ளது.

இதர பகுதிகளில் பெரும்பாலும் வறண்ட வானிலை நீடிக்கும்.28-04-2026 அன்று, மேற்கு தொடர்ச்சி மலை மற்றும் தென்கடலோர மாவட்டங்களில் இடியுடன் கூடிய மழை சாத்தியம் காணப்படுகிறது.

ஆனால் மாநிலத்தின் பிற பகுதிகளில் வானிலை பெரும்பாலும் உலர்ந்தே இருக்கும்.29 மற்றும் 30-04-2026 ஆகிய தேதிகளில், தமிழகம் முழுவதும், புதுவை மற்றும் காரைக்கால் பகுதிகளிலும் சிதறலாக மழை பெய்யக்கூடும் என தெரிவிக்கப்படுகிறது.

வெப்பநிலை நிலவரத்தைப் பொருத்தவரை, 24 முதல் 26ஆம் தேதி வரை குறிப்பிடத்தக்க மாற்றங்கள் இல்லாமல் நிலைத்திருக்கலாம். 27 மற்றும் 28ஆம் தேதிகளில் வெப்பநிலை சற்றே அதிகரிக்கும் வாய்ப்பு உள்ளது.உள் தமிழக மாவட்டங்களில், இயல்பை விட 2 முதல் 3 டிகிரி செல்சியஸ் வரை அதிக வெப்பம் பதிவாகக்கூடும்.

கடலோர பகுதிகளில் வெப்பநிலை இயல்பை ஒட்டியே இருந்தாலும், அதிக ஈரப்பதத்தால் சற்று அசௌகரியமான சூழல் உருவாகும்.சென்னை மற்றும் புறநகர் பகுதிகளில் இன்று மற்றும் நாளை வானம் பகுதியளவு மேகமூட்டத்துடன் காணப்படும்.

அதிகபட்ச வெப்பநிலை 37 முதல் 38 டிகிரி செல்சியஸை எட்டக்கூடும்; குறைந்தபட்ச வெப்பநிலை சுமார் 28 டிகிரி செல்சியஸ் அளவில் இருக்கும். அதிக வெப்பத்துடன் கூடிய ஈரப்பதம் காரணமாக மக்கள் சற்று சிரமம் அனுபவிக்க நேரிடலாம் என தெரிவிக்கப்படுகிறது.