சென்னை மாநகராட்சி தூய்மைப் பணிகளை தனியாரிடம் ஒப்படைப்பதை எதிர்த்து, ரிப்பன் மாளிகையின் முன்பு, கடந்த ஆகஸ்ட் 01-ஆம் தேதி முதல் போராட்டம் நடைபெற்றது. தூய்மை பணியாளர்கள் 'தங்களின் பணிகளை தனியாரிடம் ஒப்படைக்கக் கூடாது; திமுக அளித்த தேர்தல் வாக்குறுதியின் பணி நிரந்தரம் செய்ய வேண்டும்' உள்ளிட்ட கோரிக்கைகளை வலியுறுத்தி இரவு பகலாக போராட்டம் நடத்தினர். 

13-வது நாளாக தொடர்ந்த போராட்டத்தில் தமிழக காவல்துறையினர் தூய்மைப் பணியாளர்களை நள்ளிரவில்  வலுக்கட்டாயமாக கைது செய்தனர். இருப்பினும் இன்னமும் தூய்மைப் பணியாளர்களின் கோரிக்கைகளை தமிழக அரசு நிறைவேற்றவில்லை.

இதனையடுத்து, சென்னை மாநகராட்சியின் 05 மற்றும் 06 ஆவது மண்டல தூய்மை பணியாளர்களுக்கு மீண்டும் 31.7.2025 தேதியில் வழங்கப்பட்ட ஊதிய பணி நிலைமையிலேயே மீண்டும் பணி வழங்க வேண்டும் என்றும், தமிழக முதலமைச்சர் தலையிட்டு பிரச்சினைக்கு தீர்வு காண வலியுறுத்தியும் தூய்மைப் பணியாளர்கள் உண்ணாவிரத போராட்டத்தில் ஈடுபட்டனர். 

நீதிமன்றத்தில் உத்தரவு பெற்று அம்பத்தூரில் உள்ள உழைப்போர் உரிமை இயக்க தலைமை அலுவலகத்தில் கடந்த 17-ஆம் தேதி முதல் ஜெனோவா, பாரதி, கீதா, வசந்தி ஆகிய நான்கு பெண் தூய்மை பணியாளர்கள் கால வரையற்ற உண்ணாவிரத போராட்டத்தில் ஈடுபட்டனர்.

13-வது நாளாக நேற்று நடந்த உண்ணாவிரத போராட்டத்தில் இருந்த நான்கு பேரில் ஜெனோவாவிற்கு உடல்நிலை மோசமடைந்தது. அவர் 108 ஆம்புலன்ஸ் உதவி மூலம் கீழ்பாக்கம் அரசு மருத்துவமனைக்கு சிகிச்சைக்காக அனுப்பி வைக்கப்பட்டார். இதனையடுத்து 03 பெண் தூய்மைப் பணியாளர்கள் உண்ணாவிரத போராட்டத்தை தொடர்ந்து வந்தனர். 

இந்நிலையில், 14-வது நாளான இன்று உண்ணாவிரதப் போராட்டத்தில் இருந்த மூன்று தூய்மை பணியாளர்களில் பாரதி என்பவருக்கு உடல்நிலை பாதிப்படைந்தது. இதில் பாரதி மயங்கிய நிலையில்,  108 ஆம்புலன்ஸ் உதவியுடன் அவரை சிகிச்சைக்காக மருத்துவமனைக்கு அனுப்பி வைத்தனர். இந்நிலையில், மீதமுள்ள இரண்டு பெண் தூய்மை பணியாளர்கள் மட்டுமே தங்களது உண்ணாவிரத போராட்டத்தை தற்போது தொடர்ந்து வருகின்றனர்.