கடலூரில் பாதாள சாக்கடை கழிவுநீர் சாலையில் தேங்கியதால் ஏற்பட்ட வழுக்கலில், பயணிகளுடன் சென்ற ஆட்டோ தலைகுப்புறக் கவிழ்ந்து சில மீட்டர் தூரம் சறுக்கிச் சென்றது. இந்த விபத்தில் ஆட்டோவில் பயணித்த 4 பேர் காயமடைந்தனர். சாலையில் கழிவுநீர் தேங்கியதால் ஏற்பட்ட இந்த விபத்து அப்பகுதியில் பரபரப்பை ஏற்படுத்தியுள்ளது.கடலூர் மாநகராட்சிக்கு உட்பட்ட வண்டிப்பாளையம் பகுதியில் கடந்த சில நாட்களாகப் பாதாள சாக்கடையில் அடைப்பு ஏற்பட்டுள்ளது.

இதனால் கழிவுநீர் வெளியேறி, அப்பகுதியின் முக்கிய சாலையில் குளம்போல் தேங்கியுள்ளது. இதன் காரணமாகச் சாலை முழுவதும் வழுக்கும் நிலையில் இருந்ததாகத் தெரிகிறது.கழிவுநீர் தேங்கிய சாலையில் வாகன ஓட்டிகள் மிகுந்த சிரமத்துடன் சென்று வந்தனர். இந்த நிலையில், நேற்று திங்கள்கிழமை வண்டிப்பாளையம் பிரதான சாலை வழியாகப் பயணிகளை ஏற்றிக்கொண்டு ஆட்டோ ஒன்று சென்று கொண்டிருந்தது.

அப்போது சாலையில் தேங்கியிருந்த கழிவுநீரில் ஆட்டோவின் சக்கரங்கள் எதிர்பாராதவிதமாக வழுக்கியதாகத் தெரிகிறது. இதனால் ஓட்டுநரின் கட்டுப்பாட்டை இழந்த ஆட்டோ, சாலையின் நடுவே திடீரென தலைகீழாகக் கவிழ்ந்தது. கவிழ்ந்த வேகத்தில் ஆட்டோ சில மீட்டர் தூரம் சாலையில் சறுக்கிச் சென்றது.

இந்த எதிர்பாராத விபத்தால் ஆட்டோவுக்குள் இருந்த பயணிகள் அலறினர். இதில் ஆட்டோவில் பயணித்த 4 பேர் காயமடைந்தனர். சாலையில் ஆட்டோ கவிழ்ந்து சறுக்கிச் சென்ற சம்பவம் அப்பகுதியில் இருந்தவர்களை அதிர்ச்சியடையச் செய்தது.விபத்தைக் கண்ட அப்பகுதி பொதுமக்களும் வியாபாரிகளும் உடனடியாக ஓடிவந்து கவிழ்ந்த ஆட்டோவைத் தூக்கி நிறுத்தினர். மேலும், உள்ளே சிக்கியிருந்த பயணிகளைப் பத்திரமாக மீட்டனர்.

காயமடைந்த 4 பேரும் சிகிச்சைக்காக அருகிலுள்ள அரசு மருத்துவமனைக்கு அனுப்பி வைக்கப்பட்டனர்.இதுகுறித்து தகவலறிந்த காவலர்கள், விபத்தில் காயமடைந்தவர்கள் பற்றிய விவரங்களையும் சம்பவத்தின் சூழ்நிலைகளையும் விசாரித்து வருகின்றனர்.இந்த விபத்து தொடர்பான கண்காணிப்புப் படக்கருவிக் காட்சிகள் வெளியாகி, பொதுமக்களிடையே அதிர்ச்சியை ஏற்படுத்தியுள்ளன.

பாதாள சாக்கடை அடைப்பால் கழிவுநீர் சாலையில் தொடர்ந்து தேங்குவதால் விபத்து அபாயம் நிலவுவதாக அப்பகுதி மக்கள் குற்றம்சாட்டியுள்ளனர்.இதுகுறித்து நகராட்சி நிர்வாகத்திடம் பலமுறை கவனத்திற்குக் கொண்டு சென்றும் உரிய நடவடிக்கை எடுக்கப்படவில்லை என்று பொதுமக்களும் சமூக ஆர்வலர்களும் புகார் தெரிவித்துள்ளனர்.

எனவே, பொதுமக்களின் பாதுகாப்பைக் கருத்தில்கொண்டு, பாதாள சாக்கடை அடைப்பை உடனடியாகச் சரிசெய்து, சாலையில் தேங்கியுள்ள கழிவுநீரை அகற்ற மாநகராட்சி அதிகாரிகள் விரைந்து நடவடிக்கை எடுக்க வேண்டும் என்று அப்பகுதி மக்கள் வலியுறுத்தியுள்ளனர்.