தூத்துக்குடி வ.உ.சி. கல்லூரியின் நிலத்தியல் துறை பேராசிரியர் செல்வம், உலகின் சிறந்த 2 சதவீத விஞ்ஞானிகள் பட்டியலில் தொடர்ந்து இடம்பிடித்து சாதனை படைத்துள்ளார். உலக அளவில் பல்வேறு ஆராய்ச்சியாளர்களுடன் போட்டியிட்டு, சுற்றுச்சூழல் அறிவியல் துறையிலும் இந்திய அளவிலும் குறிப்பிடத்தக்க தரவரிசையைப் பெற்றுள்ள அவருக்குப் பாராட்டுகள் குவிந்து வருகின்றன.

அமெரிக்காவின் ஸ்டான்போர்டு பல்கலைக்கழகத்துடன் தொடர்புடைய எல்சேவியர் நிறுவனம் வெளியிடும் முன்னணி விஞ்ஞானிகள் பட்டியல், ஆராய்ச்சித் துறையில் முக்கியத்துவம் வாய்ந்ததாகக் கருதப்படுகிறது. உலகம் முழுவதும் சுமார் ஒரு லட்சம் முன்னணி விஞ்ஞானிகள் இடம்பெறும் இந்தப் பட்டியல், 22 முக்கிய அறிவியல் துறைகளையும் 176 துணைத் துறைகளையும் உள்ளடக்கியது.

ஆய்வுகளின் தரம், பிற ஆய்வுகளில் மேற்கோள் காட்டப்படும் எண்ணிக்கை உள்ளிட்ட பல்வேறு புள்ளிவிவர அளவுகோல்களின் அடிப்படையில் விஞ்ஞானிகளின் பங்களிப்பு மதிப்பிடப்படுகிறது. அந்த வகையில், 2026-ஆம் ஆண்டுக்கான உலகின் சிறந்த 2 சதவீத விஞ்ஞானிகள் பட்டியல் தற்போது வெளியிடப்பட்டுள்ளது.இதில் தூத்துக்குடி வ.உ.சி. கல்லூரி நிலத்தியல் துறை பேராசிரியர் செல்வம், உலக அளவில் 56,663-வது இடத்தைப் பிடித்துள்ளார்.

கடந்த 2025-ஆம் ஆண்டு அவர் 57,017-வது இடத்தில் இருந்த நிலையில், தற்போது தனது தரவரிசையை மேலும் உயர்த்தியுள்ளார். இதன் மூலம், தொடர்ந்து 6-வது முறையாக அவர் இந்தப் பட்டியலில் இடம்பெற்று சாதனை படைத்துள்ளார்.சுற்றுச்சூழல் அறிவியல் துறையில் உலக அளவில் 1,40,934 ஆராய்ச்சியாளர்கள் இடம்பெற்றுள்ள நிலையில், பேராசிரியர் செல்வம் 1,253-வது இடத்தைப் பெற்றுள்ளார். இதே துறையில் இந்திய அளவில் 74-வது இடத்தைப் பிடித்துள்ளார்.

அனைத்து அறிவியல் துறைகளையும் உள்ளடக்கிய இந்திய அளவிலான தரவரிசையில், மொத்தம் 6,922 ஆராய்ச்சியாளர்களில் 1,042-வது இடத்தைப் பெற்று, முதல் 0.15 சதவீத ஆராய்ச்சியாளர்களில் ஒருவராகத் திகழ்கிறார். மேலும், தமிழகத்தில் நிலத்தியல் துறையில் முதலிடத்தையும் பெற்றுள்ளார் என்பது குறிப்பிடத்தக்கது.

பேராசிரியர் செல்வம் நிலத்தடி நீர்வள ஆய்வு மற்றும் மேலாண்மை, கடலோரப் பகுதிகளில் நிலத்தடி நீரின் தன்மை, சுற்றுச்சூழல் மாசுபாடு, நுண்நெகிழித் துகள்களால் ஏற்படும் பாதிப்புகள், கடலோரச் சுற்றுச்சூழலில் நிகழும் மாற்றங்கள் உள்ளிட்ட பல்வேறு முக்கியப் பிரிவுகளில் ஆராய்ச்சிகளை மேற்கொண்டு வருகிறார்.

தனது ஆய்வுப் பணிகளின் மூலம் அறிவியல் துறைக்குக் குறிப்பிடத்தக்க பங்களிப்பை வழங்கி வரும் அவர், இதுவரை 150-க்கும் மேற்பட்ட ஆய்வுக் கட்டுரைகளையும் 5 நூல்களையும் வெளியிட்டுள்ளார்.

உலக அளவில் தொடர்ந்து அங்கீகாரம் பெற்று வரும் பேராசிரியர் செல்வத்துக்கு வ.உ.சி. கல்லூரிச் செயலாளர் ஏ.பி.சி.வி. சொக்கலிங்கம், கல்லூரி முதல்வர் வீரபாகு, பேராசிரியர்கள் மற்றும் மாணவர்கள் வாழ்த்து தெரிவித்தனர். அவரது ஆராய்ச்சிப் பணிகளுக்கும் கல்விசார் சாதனைக்கும் பலரும் பாராட்டுகளைத் தெரிவித்து வருகின்றனர்.