சென்னை காசிமேடு மீன்பிடித் துறைமுகத்தில் நிறுத்தி வைக்கப்பட்டிருந்த விசைப்படகு ஒன்றில் இன்று திடீரென தீப்பற்றி எரிந்தது. தீ மளமளவெனப் பரவிய நிலையில், படகில் இருந்த எரிவாயு உருளையும் பயங்கர சத்தத்துடன் வெடித்துச் சிதறியது. இதனால் அதிர்ச்சியடைந்த மீனவர்களும் பொதுமக்களும் அச்சத்தில் அலறியடித்து ஓடியதால், துறைமுகப் பகுதியில் பெரும் பரபரப்பு ஏற்பட்டது.சென்னை காசிமேடு மீன்பிடித் துறைமுகத்தில் ஏராளமான விசைப்படகுகள் நிறுத்தி வைக்கப்பட்டிருந்தன.

அப்பகுதியில் மீனவர்களும் பொதுமக்களும் வழக்கம்போல் தங்களது பணிகளில் ஈடுபட்டிருந்தனர். இந்த நிலையில், இன்று புதன்கிழமை துறைமுகத்தில் நிறுத்தப்பட்டிருந்த விசைப்படகு ஒன்றில் திடீரென தீப்பற்றியது.படகில் இருந்து கரும்புகை வெளியேறியதுடன், தீயும் வேகமாகப் பரவத் தொடங்கியது.

இதைக் கண்ட அப்பகுதியினர் செய்வதறியாது திகைத்தனர். தீயின் வெப்பம் அதிகரித்த நிலையில், படகில் இருந்த எரிவாயு உருளை திடீரென பயங்கர சத்தத்துடன் வெடித்துச் சிதறியது.எதிர்பாராத வகையில் கேட்ட வெடிச்சத்தத்தால் துறைமுகப் பகுதியில் இருந்த மீனவர்களும் பொதுமக்களும் நிலைகுலைந்தனர்.

என்ன நடந்தது என்பதை உணர்வதற்குள் அச்சம் சூழ்ந்ததால், பலரும் அலறியடித்தபடி அங்கிருந்து பாதுகாப்பான இடங்களை நோக்கி ஓடினர்.இதற்கிடையே, நங்கூரமிட்டு நிறுத்தப்பட்டிருந்த விசைப்படகில் தீ கொழுந்துவிட்டு எரியத் தொடங்கியது. சில நிமிடங்களிலேயே படகு முழுவதும் தீ பரவியதால், அதன் பல்வேறு பகுதிகள் தீக்கிரையாகின.

எரியும் படகில் இருந்து எழுந்த கரும்புகையும், எரிவாயு உருளை வெடித்ததில் ஏற்பட்ட சேதங்களும் அப்பகுதியில் பெரும் அச்சத்தை ஏற்படுத்தின.விபத்து குறித்து தகவல் அறிந்த தீயணைப்பு மற்றும் மீட்புப் பணிகள் துறையினர் உடனடியாகச் சம்பவ இடத்துக்கு விரைந்து சென்றனர்.

தீயை மேலும் பரவவிடாமல் கட்டுப்படுத்துவதற்காகத் தீயணைப்பு வீரர்கள் தீவிரமாகப் போராடினர்.நீண்ட நேரப் போராட்டத்துக்குப் பிறகு, விசைப்படகில் பற்றி எரிந்த தீ முழுமையாக அணைக்கப்பட்டது. இருப்பினும், தீவிபத்தால் படகு பெரும் சேதமடைந்தது.இந்தத் தீவிபத்துக்கான காரணம் குறித்து காசிமேடு காவலர்கள் விசாரணை மேற்கொண்டு வருகின்றனர்.

படகில் ஏற்பட்ட மின்கசிவு அல்லது எரிவாயு உருளை வெடித்தது விபத்துக்குக் காரணமாக இருக்கலாம் என முதற்கட்ட விசாரணையில் சந்தேகிக்கப்படுகிறது. விசாரணையின் முடிவிலேயே தீவிபத்துக்கான உண்மையான காரணம் தெரியவரும் என எதிர்பார்க்கப்படுகிறது.