2018ஆம் ஆண்டு திருச்சி விமான நிலையத்தில் மதிமுக மற்றும் நாம் தமிழர் கட்சி உறுப்பினர்கள் இடையே ஏற்பட்ட மோதல் தொடர்பாக பதிவு செய்யப்பட்ட வழக்கில், நாம் தமிழர் கட்சி ஒருங்கிணைப்பாளர் சீமான் உட்பட 19 பேர் இன்று நீதிமன்றத்தால் விடுவிக்கப்பட்டனர்.

அந்த வருடம் ஏற்பட்ட மோதலில், இரு தரப்பினரும் ஒருவர் மற்றொருவரை தாக்கிக் கொண்டதாகவும், இது பொதுமக்களுக்கு கடும் இடையூறாக இருந்ததாகவும் போலீசார் தெரிவித்தனர். இதையடுத்து, இரு கட்சியினரையும் அடக்கிய போலீசார் சீமான் உள்ளிட்ட 19 பேர் மீது வழக்குப் பதிவு செய்தனர்.

7 ஆண்டுகளாக விசாரணை நடைபெற்ற இந்த வழக்கில், சீமான் கடந்த ஜூலை 16 அன்று திருச்சி இரண்டாவது கூடுதல் மாவட்ட நீதிமன்றத்தில் ஆஜராகி விளக்கம் அளித்தார்.

வழக்கை விசாரித்த நீதிபதி கோபிநாத், ஜூலை 19 அன்று தீர்ப்பு வழங்குவதாக அறிவித்திருந்தார். இன்று நடைபெற்ற வழக்கில், போதிய ஆதாரங்கள் இல்லாத காரணத்தால், 19 பேரும் குற்றமற்றவர்களாக அறிவிக்கப்பட்டனர்.

பல ஆண்டுகளாக நீடித்த இந்த வழக்கு வழக்கறிஞர்கள், கட்சி ஆதரவாளர்கள் மத்தியில் ஒரு புதிய யுத்தநிலை முடிவுக்கு வந்ததாகக் கூறப்படுகிறது. மேலும் அண்மை காலமாக இரு கட்சி தலைவர்களும் ஒருவரையொருவர் பற்றி பேசுவதை தவிர்த்தும் வருகின்றனர் என்பது குறிப்பிடத்தக்கது.