சென்னை: தமிழக அரசு ரேஷன் பொருட்கள் விநியோகத்தில் புதிய மாற்றத்தை கொண்டுவரும் வகையில், வீடு தேடி ரேஷன் பொருட்கள் வழங்கும் திட்டம் ஒன்றை ஜூலை 1 முதல் சோதனை அடிப்படையில் 10 மாவட்டங்களில் தொடங்கவுள்ளது. முதற்கட்டமாக, 70 வயதுக்கு மேற்பட்ட மூத்த குடிமக்களுக்கு இது அமல்படுத்தப்படும் என அதிகாரிகள் தெரிவித்துள்ளனர்.

உணவுப் பாதுகாப்பு – அரசு நோக்கம்

தமிழ்நாட்டில் சுமார் 2.25 கோடி குடும்ப அட்டைகள் செயல்பாட்டில் உள்ளன. இதன் மூலம் 6.92 கோடி மக்கள் பயனடைகின்றனர். தமிழ்நாடு அரசின் பொது விநியோகத் திட்டம் (PDS) உணவுப் பாதுகாப்பை உறுதி செய்யும் முக்கிய திட்டமாக திகழ்கிறது. மாநிலம் முழுவதும் 34,773 நியாய விலைக் கடைகள் இயங்கி வருகின்றன. இவை அரசி, கோதுமை, சக்கரை, பருப்பு, பாமாயில், மண்ணெண்ணெய் உள்ளிட்ட அத்தியாவசியப் பொருட்களை வழங்குகின்றன.

ஏன் இந்த புதிய திட்டம்?

வயதான குடிமக்கள், நடக்க இயலாதவர்கள் மற்றும் ஆதரவு இல்லாதோர் – இவர்கள் ரேஷன் கடைகளுக்குச் சென்று பொருட்கள் வாங்குவதில் சிரமம் அனுபவிக்கின்றனர். இவர்களுக்கு உதவுவதற்காக, அரசு வீட்டிற்கே ரேஷன் பொருட்கள் கொண்டு சென்று வழங்கும் திட்டத்தைத் திட்டமிட்டுள்ளது.

முதல் கட்டம் – 10 மாவட்டங்கள்

இத்திட்டம் ஜூலை 1, 2025 முதல் பின்வரும் 10 மாவட்டங்களில் சோதனை அடிப்படையில் தொடங்கப்பட உள்ளது:

1. சென்னை

2. ராணிப்பேட்டை

3. ஈரோடு

4. தர்மபுரி

5. நாகப்பட்டினம்

6. திருநெல்வேலி

7. சிவகங்கை

8. திண்டுக்கல்

9. நீலகிரி

10. கடலூர்

திட்டத்தின் செயல்முறை:

• அரசு சார்பில் சிறிய வாகனங்கள் அல்லது லாரிகள் மூலமாக ரேஷன் பொருட்கள் வீட்டுக்கு கொண்டு செல்லப்படும்

• பயனாளியின் ஆதார் விவரங்கள் மற்றும் விழிரேகை சரிபார்த்த பின்னரே பொருட்கள் வழங்கப்படும்

• இந்த சேவை முதற்கட்டமாக 70 வயதுக்கு மேற்பட்ட மூத்த குடிமக்களுக்கு மட்டுமே

எதிர்கால திட்டம்:

சோதனை நடவடிக்கைகளுக்குப் பிறகு, இந்த திட்டம் ஆகஸ்ட் அல்லது செப்டம்பர் மாதங்களில் தமிழகம் முழுவதும் விரிவுபடுத்தப்படும் என அதிகாரிகள் தெரிவித்துள்ளனர்.

வீடு தேடி ரேஷன் விநியோகம் என்பது முதியோர்களுக்கேற்ப திட்டமிடப்பட்ட சமூக நலத்திட்டமாகும். உணவுப் பாதுகாப்பையும், செல்வதற்கு இயலாத மக்களின் அடிப்படைத் தேவைகளையும் பூர்த்தி செய்யும் இந்த முயற்சி, தமிழக அரசு மக்களுக்காக எடுத்து வைத்துள்ள முக்கியமான ஒரு புதிய படியாக கருதப்படுகிறது.