சென்னையில் சட்டவிரோத கியாஸ் பதுக்கல் முறியடிப்பு...! அதிரடி ரெய்டு...! - 40 சிலிண்டர்கள் சிக்கின

மத்திய கிழக்கில் நீடித்து வரும் போர் பதற்றத்தின் தாக்கம், எரிவாயு சந்தையிலும் தீவிர அதிர்வை ஏற்படுத்தியுள்ளது. இதன் விளைவாக, வணிக பயன்பாட்டிற்கான கியாஸ் சிலிண்டர் விலை திடீரென உயர்வு கண்டுள்ளது. மாதத்தின் தொடக்க நாளான நேற்று, எண்ணெய் நிறுவனங்கள் விலையை கணிசமாக உயர்த்தியுள்ளன.

அதன்படி, சென்னையில் 19 கிலோ எடையுடைய வணிக கியாஸ் சிலிண்டர் விலை ரூ.993 உயர்ந்து, ரூ.3,237-க்கு விற்பனை செய்யப்படுகிறது.

இதேவேளை, சிலிண்டர் பற்றாக்குறையை வாய்ப்பாக பயன்படுத்தி பதுக்கல் செய்து, அதிக விலைக்கு விற்பனை செய்வோர் மீது கடுமையான நடவடிக்கை எடுக்கப்படும் என அரசு தரப்பில் எச்சரிக்கை தெரிவிக்கப்படுகின்றது.

இந்நிலையில், சென்னை திருவான்மியூரில் உள்ள ஒரு இல்லத்தில் சட்டவிரோதமாக கியாஸ் சிலிண்டர்கள் பதுக்கி வைக்கப்பட்டுள்ளதாக காவலர்களுக்கு ரகசிய தகவல் கிடைத்தது.

அந்த தகவலின் அடிப்படையில் விரைந்து சென்ற காவலர்கள், அங்கு மறைத்து வைக்கப்பட்டிருந்த 40 கியாஸ் சிலிண்டர்களை பறிமுதல் செய்தனர்.

இந்த சம்பவம் தொடர்பாக நீலமேகம் மற்றும் குமார் ஆகிய இருவரை காவலர்கள் கைது செய்து, தீவிர விசாரணை மேற்கொண்டு வருகின்றனர்.