மதுக்கரை வனப்பகுதி பகுதியில் நிகழ்ந்த துயரமான சம்பவம், வன உயிரின பாதுகாப்பு குறித்து மீண்டும் கேள்விகளை எழுப்பியுள்ளது. மின்மாற்றி அருகே சென்ற காட்டு யானை, மின்கம்பியை துதிக்கையால் இழுத்தபோது மின்சாரம் தாக்கி பரிதாபமாக உயிரிழந்த சம்பவம் வனத்துறையினரையும் பொதுமக்களையும் சோகத்தில் ஆழ்த்தியுள்ளது.

வனத்துறையினர் மேற்கொண்ட ஆய்வில், உயிரிழந்தது சுமார் 25 வயது மதிக்கத்தக்க ஆண் யானை என்பது தெரியவந்துள்ளதாக தெரிவிக்கப்பட்டுள்ளது. உணவு மற்றும் தண்ணீர் தேடி, வனப்பகுதியை ஒட்டிய தோட்டங்களுக்கும் குடியிருப்பு பகுதிகளுக்கும் யானைகள் அடிக்கடி வருவதாகவும் வனத்துறை அதிகாரிகள் தெரிவித்துள்ளனர்.

இந்த நிலையில், சம்பவத்தன்று யானை மின்மாற்றி அமைந்திருந்த பகுதியை அணுகியபோது, அங்கிருந்த மின்கம்பியை துதிக்கையால் பிடித்து இழுத்ததாக தெரிவிக்கப்படுகிறது.

அதில் ஏற்பட்ட மின்சார தாக்குதலால் யானை சம்பவ இடத்திலேயே சரிந்து உயிரிழந்ததாக தெரிவிக்கப்பட்டுள்ளது.இந்தத் தகவல் அறிந்த வனத்துறையினர் மற்றும் கால்நடை மருத்துவ குழுவினர் உடனடியாக சம்பவ இடத்துக்கு சென்று யானையின் உடலை பரிசோதனை செய்தனர்.

தொடர்ந்து உடற்கூறு ஆய்விற்கான நடவடிக்கைகளும் மேற்கொள்ளப்பட்டதாக தெரிவிக்கப்பட்டுள்ளது.இந்த துயரச் சம்பவத்தைத் தொடர்ந்து, வனப்பகுதிகளை ஒட்டியுள்ள தோட்டங்கள் மற்றும் விவசாய நிலங்களுக்கான மின்சார கட்டமைப்புகள் பாதுகாப்பாக அமைக்கப்பட வேண்டும் என்றும், யானைகள் மற்றும் பிற வன உயிரினங்கள் அணுக முடியாத வகையில் முன்னெச்சரிக்கை ஏற்பாடுகள் செய்யப்பட வேண்டும் என்றும் மின்வாரிய அதிகாரிகளிடம் வனத்துறை வலியுறுத்தியுள்ளது.