தீபாவளி திருநாளைத் தொடர்ந்து, சென்னையின் காற்றுத் தரம் கணிசமாக பாதிக்கப்பட்டுள்ளது. பட்டாசுகள் வெடித்ததனால் ஏற்பட்ட மாசுபாட்டை மதிப்பிடும் நோக்கில், தமிழ்நாடு மாசு கட்டுப்பாட்டு வாரியம் நகரின் பல்வேறு பகுதிகளில் காற்று மற்றும் ஒலி மாசு அளவீடுகளை பதிவு செய்தது.

மாசு கட்டுப்பாட்டு வாரியத்தின் அளவீட்டு அளவுகோலின்படி, காற்று தரக் குறியீடு (AQI) 0–50 வரை இருந்தால் ‘நல்லது’ எனவும், 51–100 ‘திருப்திகரமானது’, 101–200 ‘மிதமானது’, 201–300 ‘மோசமானது’, 301–400 ‘மிகவும் மோசமானது’, 401–500 ‘கடுமையானது’ எனவும் வகைப்படுத்தப்பட்டுள்ளது.

இந்த அளவீட்டின் படி, தீபாவளி நாளின் பின்னர் சென்னை முழுவதும் சராசரி AQI மதிப்பு 154 ஆகப் பதிவாகியுள்ளது. இது ‘மிதமான’ பிரிவுக்குள் வரும் மதிப்பாகும். அதேசமயம், பெருங்குடி பகுதியில் அதிகபட்சமாக 229 புள்ளிகள் பதிவாகியுள்ளதால், அங்கு காற்றின் தரம் ‘மோசமானது’ எனக் கருதப்படுகிறது.

மற்ற பகுதிகளில் — மணலி 175, மணலி நியூ டவுன் 152, வேளச்சேரி 152, அரும்பாக்கம் 146, ஆலந்தூர் 127, அம்பத்தூர் 100 என AQI மதிப்புகள் பதிவு செய்யப்பட்டுள்ளன.

கடந்த ஆண்டுடன் ஒப்பிடும்போது, இந்த ஆண்டின் தீபாவளிக்குப் பிறகு காற்று மாசு அளவு குறைவாகவே பதிவாகியுள்ளது. இதற்கு இடைவேளை மழை காரணமாக, காற்றில் இருந்த மாசுப் பொருட்கள் தணிந்ததாக நிபுணர்கள் கூறுகின்றனர்.

எனினும், நகரின் காற்று தரம் இன்னும் சீராக இல்லை என்பதால், மூச்சுத் திணறல் அல்லது சுவாசக் கோளாறு உள்ளவர்கள் வெளியில் செல்வதைத் தவிர்க்குமாறு மருத்துவர்கள் எச்சரிக்கை விடுத்துள்ளனர்.