நமது அண்டைய தீவு நாடான இலங்கையை கொடூரமாக சூறையாடிய டிட்வா புயல்  வட தமிழகத்தை நோக்கி  நகர்ந்து வருகிறதாக சென்னை வானிலை மையம் தெரிவித்துள்ளது. இது தொடர்பில் வானிலை ஆய்வு மையத்தின் தென் மண்டல தலைவர் அமுதா அளித்த பேட்டியில் கூறியுள்ளதாவது:

சென்னை நகர், புறநகர்ப் பகுதிகளில் விட்டு விட்டு மழை பெய்துள்ளதாகவும், நாகப்பட்டினம், காரைக்காலில் 05-ஆம் எண் புயல் சின்னம் ஏற்றப்பட்டுள்ளதோடு, நாளை மறுதினம் டிட்வா புயல் வலுவிழக்க வாய்ப்புள்ளது என்று கூறியுள்ளார்.

அத்துடன், இன்று தமிழகத்தில் மயிலாடுதுறை, கடலுார், விழுப்புரம், செங்கல்பட்டு, நாகை என 05 மாவட்டங்களுக்கு ரெட் அலர்ட் விடுத்துள்ளதோடு, 13 மாவட்டங்களுக்கு ஆரஞ்ச் அலர்ட் விடப்பட்டுள்ளது. வேதாரண்யத்தில் இருந்து 110 கிலோமீட்டர் தொலைவில் நிலை கொண்டுள்ள டிட்வா புயல் நகரும் வேகம் அதிகரித்துள்ளதோடு, தற்போது மணிக்கு 10 கிலோமீட்டர் வேகத்தில் நகர்ந்து வருகிறதாக தெரிவித்துள்ளார்.

குறித்த டிட்வா புயல் சென்னைக்கு அருகே 350 கி.மீ துாரத்தில் மையம் கொண்டுள்ளதாகவும், இன்று நள்ளிரவு வட தமிழகத்தை நெருங்கும் என்றும் அறிவித்துள்ளார். மேலும், நாகை மாவட்டத்தில் மிக மிக அதிக மழை பெய்துள்ளதோடு, கோடியக்கரையில் 25. செ.மீ மழை பதிவாகியுள்ளதாக குறிப்பிட்டுள்ளார்.

இன்று காலை 08.30 மணி முதல் மாலை 03.30 மணி வரையிலான கடந்த 07 மணி நேரத்தில் நாகையில் 11 செ.மீ மழை கொட்டி தீர்த்துள்ளதாகவும், காரைக்காலில் 13 செ.மீ மழை பதிவாகியுள்ளதாகவும் குறிப்பிட்டுள்ளார்.

மேலும், டிட்வா புயலின் தாக்கம் காரணமாக, வட தமிழகத்தில் இன்று தரைக்காற்று 60 கி.மீ வேகத்தில் வீசக்கூடும். டெல்டா மாவட்டங்களில் 80 கி.மீ வேகத்திலும், சென்னையில் 75 கி.மீ வேகத்திலும் தரைக்காற்று வீசலாம் என்றும் எச்சரிக்கை விடுத்துள்ளார்.

அத்துடன், நாளை மாலை சென்னை உள்ளிட்ட வட தமிழ்நாட்டின் கடற்கரைக்கு 25 கி.மீ வரை டிட்வா புயல் நெருங்கி வரும் என்று தெரிவித்துள்ளதோடு, செங்கல்பட்டு, திருவள்ளூர், விழுப்புரம்,கடலுார் உள்ளிட்ட வட கடலோர மாவட்டங்களில் நாளை 80 கி.மீ வேகத்தில் காற்று வீசக்கூடும் எனவும், சென்னையில் நாளை 60 கி.மீ. முதல் 70 கி.மீ வேகத்தில் தரைக்காற்று வீசக்கூடும் என்றும் கூறியுள்ளார்.

அத்துடன், டிசம்பர் 01 முதல் மழை படிப்படியாக குறையக்கூடும் என்று எதிர்பார்ப்பதாக தென் மண்டல தலைவர் அமுதா தெரிவித்துள்ளார். தற்போது  டிட்வாபுயல்  இலங்கையை விட்டு முழுவதும் விலகியுள்ளது. அதாவது, இன்று சனி மாலை 05 மணி நிலவரப்படி யாழ்ப்பாணத்தில் இருந்து 80 கிலோமீட்டர் தொலைவில் குறித்த புயல் மையம் கொண்டுள்ளது.