சென்னை சூப்பர் கிங்ஸ் அணியின் முன்னாள் கேப்டன் மகேந்திர சிங் தோனி, 2026 ஐபிஎல் தொடருக்குப் பிறகு ஓய்வு பெறலாம் என்ற தகவல்கள் கிரிக்கெட் வட்டாரங்களில் பரவி வருகின்றன. வயது மற்றும் உடல்நிலை காரணமாக அவரது எதிர்காலம் குறித்து ரசிகர்கள் மத்தியில் ஏற்கனவே பல கேள்விகள் எழுந்துள்ளன.

44 வயதான தோனி, கடந்த சில ஆண்டுகளாக கணுக்கால் பகுதியில் ஏற்பட்ட காயத்தால் அவதிப்பட்டு வருகிறார். குறிப்பாக கடந்த சீசனில் அந்த காயம் அதிக பாதிப்பை ஏற்படுத்தியதாக கூறப்படுகிறது. இதன் காரணமாக இந்த ஆண்டு ஐபிஎல் தொடருக்காக அவர் தனிப்பட்ட முறையில் தீவிர பயிற்சியில் ஈடுபட்டிருந்தார்.

ஆனால் 2026 ஐபிஎல் தொடங்குவதற்கு முன்பாகவே மீண்டும் கணுக்கால் பகுதியில் காயம் ஏற்பட்டதாக தகவல்கள் வெளியானது. இதனால் தொடக்கப் போட்டிகளில் அவர் விளையாடவில்லை.

சென்னை சூப்பர் கிங்ஸ் இதுவரை 10 போட்டிகளில் விளையாடியுள்ள நிலையில், தோனி இன்னும் அணியில் களமிறங்காதது ரசிகர்களிடையே ஆச்சரியத்தை ஏற்படுத்தியுள்ளது.

இந்த நிலையில், தோனி இந்த சீசனில் மீண்டும் விளையாடுவாரா என்பது குறித்து இந்திய அணியின் முன்னாள் வீரர் ரவிச்சந்திரன் அஸ்வின் தனது கருத்தை தெரிவித்துள்ளார்.

அஸ்வின் கூறுகையில்,
"இந்த ஆண்டு தோனி விளையாடுவதற்கான வாய்ப்பு மிகவும் குறைவாகவே உள்ளது. ஆனால் சென்னை அணி கடைசி கட்டத்தில் பிளேஆஃப் வாய்ப்பை இழக்கும் நிலை ஏற்பட்டால், சேப்பாக்கத்தில் ரசிகர்களுக்கு விடை கொடுக்கும் வகையில் ஒரு கடைசி போட்டியில் களமிறங்க வாய்ப்பு இருக்கிறது" என்றார்.

இதன் மூலம், சென்னை அணி பிளேஆஃப் வாய்ப்பை இழந்தால் மட்டுமே தோனி தனது இறுதி ஆட்டத்தை விளையாடி ஓய்வு பெறக்கூடும் என்ற கருத்தை அஸ்வின் மறைமுகமாக சுட்டிக்காட்டியுள்ளார்.

மறுபுறம், சென்னை அணி தற்போது வெற்றிப் பாதைக்கு திரும்பியுள்ளதால், அணியின் சமநிலையை பாதிக்காமல் இருக்க தோனி உடனடியாக சேர்க்கப்படவில்லை என்றும் சில தகவல்கள் தெரிவிக்கின்றன.

தோனி இந்த சீசனில் மீண்டும் மைதானத்திற்கு திரும்புவாரா, அல்லது இது அமைதியான விடைபெறலாக மாறுமா என்பது குறித்து ரசிகர்கள் ஆவலுடன் காத்திருக்கின்றனர். சென்னை ரசிகர்களுக்கு, சேப்பாக்கத்தில் தோனியின் கடைசி ஆட்டம் உணர்ச்சிபூர்வமான தருணமாக அமையக்கூடும்.