அடுத்த ஆண்டு நடைபெறவுள்ள 10வது டி20 உலகக் கோப்பை கிரிக்கெட் தொடர் இந்தியா மற்றும் இலங்கையில் இணைந்து நடைபெற உள்ளது. மொத்தம் 20 அணிகள் பங்கேற்கும் இந்த உலகக் கோப்பைக்கு இதுவரை நடப்பு சாம்பியன் இந்தியா, பாகிஸ்தான், ஆஸ்திரேலியா, இங்கிலாந்து, தென்ஆப்பிரிக்கா, வெஸ்ட் இண்டீஸ் உள்ளிட்ட 15 அணிகள் தகுதி பெற்றுள்ளன. இதில் இத்தாலி முதல் முறையாக உலகக் கோப்பையில் இடம் பிடித்துள்ளது என்பது சிறப்பம்சமாகும்.

அணிகள் நான்கு பிரிவுகளாகப் பிரிக்கப்பட்டு லீக் முறையில் மோதவுள்ளன. ஒவ்வொரு பிரிவிலிருந்தும் முன்னிலைப் பெறும் இரண்டு அணிகள் சூப்பர்-8 சுற்றுக்கு முன்னேறும். போட்டிக்கான முழுமையான அட்டவணை விரைவில் வெளியாகும் என எதிர்பார்க்கப்படுகிறது.

சர்வதேச கிரிக்கெட் கவுன்சில் (ஐசிசி) அடுத்த ஆண்டு பிப்ரவரி 7 முதல் மார்ச் 8 வரை போட்டிகள் நடைபெறும் என தீர்மானித்துள்ளது. மொத்தம் 55 ஆட்டங்கள் நடைபெறவுள்ளன. அதில் இந்தியாவில் குறைந்தது ஐந்து நகரங்களிலும், இலங்கையில் இரு இடங்களிலும் போட்டிகள் நடத்தப்படும்.

இந்தியாவில் அகமதாபாத், டெல்லி, சென்னை, மும்பை, கொல்கத்தா ஆகிய நகரங்களில் ஆட்டங்கள் நடைபெறும். இறுதிப் போட்டி உலகின் மிகப்பெரிய கிரிக்கெட் மைதானமான அகமதாபாத் நரேந்திர மோடி ஸ்டேடியத்தில் நடைபெறும் என தகவல்கள் தெரிவிக்கின்றன.

மேலும், பாகிஸ்தான் அணியின் அனைத்து லீக் ஆட்டங்களும் இலங்கையின் கொழும்புவில் நடத்த தீர்மானிக்கப்பட்டுள்ளது. பாகிஸ்தான் அணி இறுதிப்போட்டிக்கு தகுதி பெற்றால், இறுதி ஆட்டத்தை கொழும்புவுக்கு மாற்ற இந்திய கிரிக்கெட் வாரியம் சம்மதம் தெரிவித்துள்ளதாக கூறப்படுகிறது.