ஜிம்பாப்வே அணிக்கு எதிரான மூன்று போட்டிகள் கொண்ட டி20 கிரிக்கெட் தொடருக்கான இந்திய அணியை பிசிசிஐ (BCCI) அறிவித்துள்ளது. வரும் ஜூலை 23-ஆம் தேதி தொடங்கவுள்ள இந்த போட்டியின் ஆடும் 11-இல் இருந்து முன்னணி விக்கெட் கீப்பர் பேட்ஸ்மேனான சஞ்சு சாம்சன், பந்துவீச்சாளர் அர்ஷ்தீப் சிங் போன்ற முன்னணி வீரர்கள் நீக்கப்பட்டுள்ளனர்.பல புதிய மற்றும் இளம் முகங்களுக்கு வாய்ப்பளிக்கப்பட்டுள்ளது.

இந்நிலையில், சஞ்சு சாம்சனுக்கு ஓய்வு அளிக்கப்பட்டதா அல்லது அவர் அணியில் இருந்து நீக்கப்பட்டாரா என்பது குறித்து பிசிசிஐ தனது செய்திக் குறிப்பில் தெளிவாகக் குறிப்பிடவில்லை.

அத்துடன் தற்போது இங்கிலாந்து சுற்றுப்பயணத்தில் இருக்கும் அக்சர் படேல், ஹர்ஷித் ராணா, வாஷிங்டன் சுந்தர், பிரசித் கிருஷ்ணா, ரவி பிஷ்னோய் ஆகியோருக்கும் இந்த அணியில் இடம் பெறவில்லை. 

இளம் வீரர்களைப் பரிசோதிப்பதற்கான ஒரு களமாகவே ஜிம்பாப்வே தொடரைப் பிசிசிஐ  வழக்கமாக பயன்படுத்தி வருகிறது. அந்த வகையில், விதர்பா மற்றும் சன்ரைசர்ஸ் ஹைதராபாத் அணிக்காக விளையாடும் ஸ்பின்னர் ஹர்ஷ் துபே முதன்முறையாக இந்திய டி20 அணியில் சேர்க்கப்பட்டுள்ளார்.

அத்துடன், சமீபத்தில் இலங்கை ஏ அணியுடனான முத்தரப்பு தொடரில் சிறப்பாகச் செயல்பட்ட வேகப்பந்து வீச்சாளர் யாஷ் தாக்கூர் மற்றும் குஜராத் டைட்டன்ஸ் அணியின் வேகப்பந்து வீச்சாளர் அசோக் சர்மா ஆகியோருக்கும் முதன்முறையாக தேசிய அணியில் வாய்ப்பு கிடைத்துள்ளது.

பஞ்சாப் கிங்ஸ் அணியின் அதிரடி தொடக்க ஆட்டக்காரரும் விக்கெட் கீப்பருமான பிரப்சிம்ரன் சிங் இந்த தொடரில் சேர்க்கப்பட்டுள்ளார். வேகப்பந்து வீச்சாளர் மயங்க் யாதவ் மற்றும் கொல்கத்தா நைட் ரைடர்ஸ் அணியின் ரிங்கு சிங் ஆகியோர் மீண்டும் இந்திய அணிக்குத் திரும்பியுள்ளனர். இளம் வீரர் வைபவ் சூர்யவன்ஷி தனது இடத்தை அணியில் தக்கவைத்துக் கொண்டுள்ளார்.

ஜிம்பாப்வே தொடருக்கான இந்திய அணி:
ஸ்ரேயாஸ் ஐயர் (கேப்டன்), வைபவ் சூர்யவன்ஷி, அபிஷேக் சர்மா, திலக் வர்மா (துணை கேப்டன்), இஷான் கிஷன் (விக்கெட் கீப்பர்), சிவம் துபே, சூர்யான்ஷ் ஷெட்ஜே, ரிங்கு சிங், ஹர்ஷ் துபே, வருண் சக்கரவர்த்தி, பிரின்ஸ் யாதவ், யாஷ் தாக்கூர், அசோக் சர்மா, மயங்க் யாதவ், பிரப்சிம்ரன் சிங் (விக்கெட் கீப்பர்).